MASALIGON si Hmong-American "The Storm" Duarn Vue (14-1-2, 4KO) nga iyang mapildi si Omega Gym Cebuano boxer ug WBA Oceania Featherweight champion "The VIP" Jessie Cris Rosales (22-1-1, 10KO) atol sa ilang engkwentro ibabaw sa ring diin si Rosales moilog sa bakus sa nahauna ang WBA Intercontinental 126-lb title karong Oktubre 20, 2018 Sabado (Domingo RP time) sa Menominee Nation Arena sa City of Oshkosh, Wisconsin State, USA.
Sa social media post sa team Vue, nagkanayon: "Congratulations to Tepora (Jhack) on your victory and for winning the WBA interim world championship. After we handle business with Rosales (Jessie Cris) we will definitely come see you!!!" kini ang gipatik sa social media pinaagi nila ni Vue ug sa iyang trainer/promoter Murid Azzam Muhammad.
Si Rosales nga gikuhaan sa Sunstar Superbalita Cebu sa iyang habig, wala gibati ug kabalaka sa mga gipang post sa iyang kontra. "Daku ko ug respeto ni Vue (Duarn) ug sa iyang kampo sir. Ang ako lang, awayon lang ni namo, may the best man win" kalma'ng tubag ni Jessie Cris, ang usa sa tulo ka managsuong Rosales boxers.
Si Rosales nga napildi batok ni Mexican ex-WBC Featherweight ug ex-WBO Bantamweight King Jhonny Gonzalez (66-10-0, 54KO) pinaagi sa 2nd-round knockout niadtong Hulyo 22, 2017 didto sa Mexico apan nakabangon dayon human midaug sab didto sa Australia niadtong Marso 11 ning tuiga via KO 2nd-round batok ni Ibrahim "La Bala" Balla (13-2-0, 7KO), wala mopasalig nga iyang matumba si Vue.
"Nakabintaha ko sa knockout punching record batok ni Vue, pero kami diri sa Omega Gym uban ni coach Jinggoy Junco, daku kaayo ug pagsalig nga nindot gyud ni nga fight" dugang sa nahimugso sa Barangay Maslog, Danao City, Cebu.
Si Vue, dili knockout artist apan volume puncher, nagbase sa Madison ang Capital City sa Wisconsin, natawo sa nasod sa Laos, gumikan sa nagsaka nga pangidaron 32 anyos, 5'3 orthodox fighter nagdali nga makaaway alang sa world title ning tuiga, gawas ni Tepora, laing gitutokan niya nga ikasangka base sa iyang mga gipang post sa social media, naglakip nila ni "The Filipino Flash" Nonito Donaire Jr., WBA Featherweight "Regular champion" Joseph "Jojo" Diaz ug si WBA Featherweight “Super Champion" Leo "El Terremoto/The Earthquake" Santa Cruz.
Samtang si Rosales, anaa karon sa iyang subsob nga ensayo ug nagdagan sa kabungtoran sa Barangay Pit-os, Cebu City, mapahiubsanon kaayong mipahibalo ning tigbalita nga si Santa Cruz ug Diaz ang naa sa iyang target lists nga makaaway ibabaw sa ring.
Rosales SugbuDak ug BolDak?
Natawo sa Barangay Maslog, Danao City, Cebu busa Sugbuanong Daku (SugbuDak) si Jessie Cris Rosales kay iyang inahan nga si Gina Morales Rosales lumad nga taga diha, apan giangkon niya nga usa sab siya ka Bol-anong Daku (BolDak) sanglit ang iyang amahan lumad ug nagpuyo karon sa Barangay Sto Niño, Lungsod sa Talibon, Bohol.
Jessie Cris Rosales ug Ciso Morales managsuon?
Morales ang gidala nga apelyido ni retired boxer former WBO Oriental champion Ciso “Kid Terrible” Morales apan igsuon sila ni Cris ug ang tinuod nga ngalan Narciso Morales Rosales Jr, gidala niini ang middle name niya sanglit sikat kaniadto ang panagribal nila ni Pinoy boxing icon Manny “Pac-Man” Pacquiao ug Mexican Superstar Erik “El Terrible” Morales. (Daniel Quindao Guden, US correspondent)