MOKABAT 20 ka mga wanted persons ang nasikop sa Davao City Police Office (DCPO) atol sa ilang gipakusgan nga Oplan Kalinaw luyo sa pagsaulog sa Kadayawan Festival.
Sumala ni DCPO director Senior Superintendent Alexander Tagum nga usa kini ka simultaneous operations niadtong Huwebes, nga miresulta sa pag-profiling sa 1,114 ka mga residente, diin 988 kanila dunay identification cards (IDs), samtang ang 126 walay napakita nga ID.
Ang 20 ka mga wanted persons nga nasikop maoy resulta sa gipagula nga mga warrants of arrest sa korte sa mga nagkadaiyang kaso.
Sa tumong nga makadalit sab og serbisyo sa katawhan, daghan ang nakahimulos sa ilang dungan nga gipahigayong free medical check-up, food feeding, ug ang pagpanghatag og mga libreng medisina.
Ang Oplan Kalinaw usa ka Joint Area Security Community Service ug usa ka Protection Operation Plan alang sa mga tawo nga pinangita sa balaud ug ang pagdalit og serbisyo sa komunidad.