SA DILI madugay ibutyag na ni Presidente Rodrigo Duterte ang mga pangalan sa mga opisyal sa Philippine National Police (PNP) nga giingong nalambigit sa pag-recycle ug pagpamaligya sa mga nasakmit nga gidiling drugas.
Sa niaging semana gipabuhagay ni Baguio City Mayor Benjamin Magalong sa Senado nga adunay mga dagkong opisyal sa PNP nga nalambigit sa recycling sa mga shabu ug nakig-abin sa mga drug lords sa nasod.
Niini, ang Senado, pinaagi sa botasyon, mihatag og pagtugot sa Blue Ribbon ug justice committee nga ilibkas ang pagtipig sa inpormasyon kalabot sa gipangbutyag ni Magalong, ang kanhi hepe sa PNP-Criminal Investigation and Detection Group.
Buot ipasabot nga ang committee makahatag na ngadto sa Presidente sa mga inpormasyon nga sikretong gihunghong ni Magalong ngadto kanila nga nag-ila kon si kinsa kining giingong mga ninja cops.
Kon nahimo sa presidente ang pagyagyag niadtong mga pulitiko nga gialegahan nga nalambigit sa gidiling drugas, walay rason nga dili kini niya mahimo ngadto sa mga kapulisan.
Si Senador Christopher “Bong” Go, ang kanhi pangabaga ni Duterte, mitug-an nga ang presidente andam mohatag og pahalipay nga P1 million sa makapatay og ninja cop; P500 sa makadakop nga buhi.
Duna man tuoy misupak apan nagpasuabi ang mipabor nga ipangyagyag ang mga pangalan ning mga pulisa. Kini aron dili maduhig sa kinatibuk-an ang ngalan sa PNP.
Kon kini maoy usa ka paagi nga mapakgang ang way hunong nga pagkatap sa gidiling drugas sa nasod, nganong dili man tuod nato ni suportahan?
Apan kinahanglang ihikyad una ang lig-ong dokumento o ebedensiya sa pag-ila sa mga ninja cops, kay tingali baya og malakip na hinuon sa pasangil kadtong nga nagtinarong sa ilang serbisyo.