“Ang Iyang kinabuhi maoy iwag dinhi kanato nga maghatag og kahayag.”
MAKALILISANG intawon pamalandungon, mga higala, ang atong mga kaniadto.
Ngitngit, kawanangan, pangit. Adunay nakig-istorya nako nga ulitawo tungod sa iyang kalagot sa iyang amahan. Sa una daw, walay adlaw nga dili siya bunalan. Walay sipyat niya nga dili siya singgitan. Matagsayop niya, siya kulatahon, matagkatawa niya, siya pahilumon. Asa man ang hustisya niana?
Usa pod ka babaye, nibisita sa akong opisina ug didto naghagulhol.
Hangtud ron, bisa'g minyo na siya, yawyawan pa gihapon siya sa iyang inahan. Sa tanang butang, siya pagakuwentahan. Palangga daw siya, mao nang hangtud karon dapat siya pagagiyahan. Unya ang apo, sa iyang lola nga gugma, pinasagdaan. Ug sa pagkamaldito sa sa apo, mao pay labanan. Ay, pagka na lang.
Tungod kini sa kangitngit sa ihibalo sa una, mga higala.
Nganong nagapangulata man ang mga amahan sa ilang mga anak? Tungod kay sila sa una, gipangkulata sab sa ilang mga amahan. Nganong magsige man og yawyaw kining atong mga inahan? Kay sila sab sa una, matag-adlaw sab nga ginayawyawan.
Mao nay panultihon nga ang imo lang gayud mahatag, mao lang ang naa kanimo. Kay kulata man ang nadawatan nila kaniadto, kulata sab ang ilang mahatag sa ilang mga anak. Kay yawyaw man ang ilang nadawatan kaniadto, yawyaw sab ang atong madunggan gikan kanila.
Pareho lang pod ni sa panultihon nga dili nimo mahatag ang wala diha kanimo. Kay wala man kay ihibalo sa saktong pagpakita sa pagpalangga, dili nimo kini mapakita og tama. Kay wala may kalinaw sa inyong panagsulti sa inyong panimalay kaniadtong bata ka pa, wala poy kalinaw ang inyong panagsulti karon sa inyong panimalay. Dili nimo mahatag ang wala diha kanimo.
Mao ning kinahanglan nato og ihibalo sa tama nga mga butang. Matud pa ni Pablo sa 2 Korinto 4:6, “Kay ang Diyos maoy nagsugo sa kahayag nga maghatag og kahayag taliwala sa kangitngit, ug nag-iwag sa atong mga kasing-kasing aron sa paghatag sab og kahayag tungod sa ihibalo sa himaya sa Diyos pinaagi sa nawong ni Hesu-Kristo.”
Ang kahayag nga atong madawat maoy ihibalo sa himaya sa Diyos diha ni Ginoong Jesus, nga maoy magpapas sa kangitngit sa atong kinabuhi.
Anaa kitang tanan sa kangitngit, mga higala. Ang atong mga ginikanan wala nasayud sa tamang pamaagi sa pagpalangga. Atong tutukan si Ginoong Jesus. Ang Iyang kinabuhi maoy iwag dinhi kanato nga maghatag og kahayag.
Sa paghibalo nato sa kinabuhi ni Ginoong Jesus, atong masayran ang himaya sa Diyos. Ug pinaagi sa pagbasa nato sa Balaang Kasulatan, atong mailhan si Ginoong Jesus. Mao kini ang atong lakang ngadto sa kahayag. Ug sa tabang sa Balaang Espiritu, atong makinabuhi si Kristo, matagamtaman nato ang tunhay'ng kahayag, kalinaw ug kalipay.