SAMA sa nanglabay nga katuigan, grandiyoso ug malampuson ang Indak-Indak sa Kadayawan 2018 nga nasaksihan kagahapon sa nag-unang kadalan sa siyudad sa Davao ug nag-showdown sa Kadayawan Square, San Pedro Street, Agosto 18, ning tuig.
“Daghang salamat sa mga Dabawenyo sa inyong suporta, sa atong mga contingents, judges, Kadayawan execom sa kalampusan sa atong Kadayawan,” mensahe ni Davao City Mayor Inday Sara Duterte.
Karon nga tuig, subling nadepensahan sa Davao City National High School Sining Sayon Dawet ang korona isip kampeyon, human giharus na sab ang kampeyonato sa Indak-Indak sa Kadayawan Davao City School-based Category.
Luyo niini, sila sab ang Best Music. Midaug sila og P500,000.00 isip premyo.
Ubang mananaug mao ang: Kawangis Performaing Arts Guild of Catalunan Pequeño National High School (4th place): Sta. Ana National High School Performing Arts Guild (3rd place); Mabini National High School (Special Program in the Arts) (2nd place).
Samtang sa Indak-Indak sa Kadayawan Open Category, midaug ang Mati National Comprehensive High School sa Mati City, Davao Oriental, diin midawat sab sila og P500,000 nga premyo.
Ikalimang pwesto ang Camanlangan National High School Dance Ensemble, sa New Bataan Compostela Valley; 4th place: Ruth Manion Babao Memorial National High School, sa Parang Maguindanao; 3rd place: Bambad National High School Performing Arts Guild, sa Isulan Sultan Kudarat ug 2nd place: Asuncion National High School Performing Arts Guild, Asuncion Davao del Norte nga mao say miangkon sa Best Music.
Sa pikas bahin, sa unang higayon gihimo ang Kadayawan Kosplay diin tema niini ang Philippine Eagle.
Ikatulong pwesto ang Malaya - Diyosa Ng Mga Agila diin ang artist mao si Kristian Luis G. Ronquillo; 2nd placer ang Tipuli diin ang artist si: Jhonelle Pasaol; ug 1st place ang Queen of Eagle ni Angel Montenegro.
Ang winner midaug og P120,000 ug round trip sa bisan asang domestic destinations gikan sa Air Asia.
Karong adlawa, 49 sab ka contingents ang apil sa Pamulak sa Kadayawan.