TALIWALA sa sugyot nga moduwa siya sa iyang gigikanan nga mao ang Charlotte, si Golden State Warriors guard Stephen Curry naglantaw nga magpabilin siyang Warrior hangtod sa iyang paretiro sa National Basketball Association (NBA).
Sa pangutana sa The Bill Simmons Podcast kabahin sa posible niyang pagbalhin sa Charlotte Hornets sa ugma damlag, daw sirado ang pultahan ni Curry ning maong ideya bisan sa kamatuoran nga kanhi sinaligan sa Hornets ang iyang amahan nga si Dell.
“Sa dihang gipangutana kon tinguha niyang humanon ang iyang karera sa NBA ubos sa kampo sa Warriors, daling nakabuhi og positibong tubag ang kanhi back-to-back NBA MVP.
“For sure I do,” tubag ni Curry, kinsa gikuha sa Warriors niadtong 2009 draft. “This is home. This is where I want to be, for obvious reasons.”
Dihang mibalik si LeBron James sa Cleveland Cavaliers gikan sa Miami Heat niadtong 2014, giangkon ni Curry nga nasulod sab sa iyang hunahuna ang pagduwa sa Charlotte apan iyang natumbok nga lisod alang kaniya ang pagduwa sa laing team.
“It’s hard to see myself anywhere else,” pamahayag ni Curry.
Ang Warriors nakasulod sa finals sa miaging upat ka seasons ug nakabira kini’g tulo ka mga titulo lakip na niini ang kasamtangan nilang back-to-back nga kalampusan.
Ang 30 anyos nga superstar adunay buhing kontrata sa Warriors nga molanat pa hangtod karong 2020-21 season.
Sama ni James, si Curry natawo sa Akron, silingan sa Cleveland sa Ohio state, apan nagdako kini sa Charlotte ug nagduwa sa Davidson sa college basketball. Reuters