Pagkatulog

DAGHAN ang nag-antos sa sakit nga insomnia bisan mga batan-on pa. Tingali tungod ra usab sa lifestyle ug pressure sa panahon karon. Mao usab ni ang hinungdan nganong di ko mo commit og sikad kauban sa akong mga higala sa mountain biking community kay maikog ko nga huwaton.

Kaniadto lagi nga grabe pa ko mokape, tagduha ka oras ra ang sagad sa akong katulog. Alas 4 na lang sa kaadlawon, gaalindasay gihapon ko nga nakiglayog sa duka, pero ang akong huna-huna naglaroylaroy. Usahay, bana-banag na, una pa ko makatulog.

Apan human nako i-limit ang akong intake sa kape, dali na kong magduka. Usahay, di na ko makapugong, magduka na ko bisan alas 10 pa sa gabii. Apan usahay kon mabalda ang akong pagkatulog, maglisod na kog balik paghinanok.

Usa sa akong buhaton mao ang pag concentrate nga naghigda ko. And akong huna-hunaon nga nagtuyok ang kalibutan, which is true, and naa ko ini. Di nako mabantayan, nahinanok na diay ko og balik.

Hinuon, lainlain ang tawo og estilo sa pagsulbad sa problema, but maayong suwayan.

Mipasamot

Tinuod, ang ehersisyo makatabang sa pagkombate sa insomnia ug uban pang mga sakit. Apan di usab maayong palab-anan. Matod sa mga eksperto, di maayong magpasingot sa gabii kay mao hinuon ni hinungdan nga maglisod ka sa pagkatulog tungod sa pagsaka sa imong adrenaline.

Mao usab ni ang hinungdan nganong di ko makatulog dayon kon mag bike to work ko kay nagsikad ko sa pag-uli. Unya, usa ko sa mga tawo nga gamay lang nga pagsaka sa adrenaline, mo-trigger dayon og insomnia. Bisan gani mokaon lang ko og gamay sa lawom nang gabii, maglisod na ko sa pagkatulog. Unya, nisamot na dihang sige kog bike bisan sa gabii. Sleeping is a struggle to some people bisan sa gamay lang nga trigger.

Depende

Sa ako nang giingon, lainlain ang tawo. Apan kon sama ka nako, try to cut caffeine consumption, likayi ang pagkaon sa lawom nang gabii ug ayaw pagpasingot labing minos duha ka oras sa di ka pa matulog. Mas maayo pang mo-relax ka og sayo, kaon og sayo ug tultol og oras sa imong pagkatulog.

Mao ni ang labing seguro nga solution sa sayon nga pagkatulog. Kay ang usa sa hinungdan sa insomnia mao ang di maayong lifestyle. Sa akoang experience, gamay lang nga disiplina ug lifestyle change, dako na og impact sa maayo nakong pagkatulog.

Mas maayong sa buntag mosikad og sayo, di sa gabii. Karon, lami na kaayo ikatulog bisan alas 10 sa gabii. Usahay, naay Dominggo, alas 8 pa lang sa gabii, nagdamgo na ko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph