Binasi sa Mga Panultihon 9:1-6; Salmo 34; Taga Efeso 5:15-20; Juan 6:51-58
MAY mga tawo nga undanon ang mga pulong. Makapanghinuklog ang mga maminaw. Dili mistil tag-as ang iyang mga pulong ni komplikadong paminawon aron mahimong undanon. Kinahanglan lamang maayong pagkapili ug inampoan. Makinaadmanon ang mga undanong pulong. Gibuhian kini sa insaktong panahon.
“Ako ang buhing pan nga mikanaog gikan sa langit, ang mokaon niining maong pan mabuhi sa dayon; ug ang pan nga akong ihatag mao ang akong unod alang sa kinabuhi sa kalibutan.” Dili lamang kini undanon kay makinaadmanon. Undanon kini kay Dios ang nagpadayag niini. Mga pulong kini nga dili minugna sa tawo kay bisag unsa ka intelehente ang usa ka tawo dili gyod niya makab-ot kining maong panghunahuna. Gasa kini gikan sa langit.
Apan ang “buhing pan nga gikan sa langit” mahimong nagpunting sa mga pulong ug buhat ni Jesus. Kay ang madungog ug makita baya adunay epekto sa nakadungog ug nakakita. Kaayohan ang dangatan sa makadungog ug makakita kang Jesus kay tuboran baya siya tanang kaayohan. Apan may lain pa kini nga kahulogan. “Kay ang akong unod tinuod nga kalan-on ug ang akong dugo tinuod nga ilimnon. Ang makigsalo sa akong unod ug moinom sa akong dugo magpabilin dinhi kanako ug ako diha kaniya.” Dili lamang diay ang madungog ug makit-an kondili ang makaon nga unod ni Cristo ang gihisgotan.
“Unod” ang pulong nga gigamit sa ebanghelyo ni Juan samtang “lawas” sa ubang ebanghelyo. Nalambigit diay ang Eyukaristiya sa pagkatawo ni Jesus kay nagkanayon ang unang kapitolo ni Juan nga “ang pulong nahimong unod”. Ang gahum ug grasya sa Eyukaristiya milangkob sa gahum ug grasya nga gipakita ni Jesus diha sa iyang pagkatawo, sa iyang publikanhong pagpangalagad, ug sa iyang kamatayon ug pagkabanhaw. Undanon kini nga kamatuoran nga kinahanglan gahinan og panahon ug usap-usapon, mapû-po ang bunga kon yak-an.
Undanon ang mga pulong sa Ang Panultihon diin gitandi niini ang Kinaadman ug Kabuang isip duha ka babaye. Kalipay ug kasuod sa Dios ang gisimbolo sa Kinaadman. Kahingpitan usab nga gisimbolo sa panimalay nga adunay pito ka mga haligi. Diha sa sulat ngadto sa mga taga Efeso gihisgotan ang Espiritu. Ang tawo nga buhong sa Espiritu dili magpasagad sa kasamtangang panahon, lahi sa tawo nga buhong sa bino. Magpataka kini og sulti apan ang puno sa Espiritu kanunayng magpasalamat sa Dios alang sa tanan. Undanon ang iyang mga pulong.
Gialirungan kita sa saba. Daghan “fake news”. Puno ang atong kahiladman sa saba. Daghang mga sabaan nga taphaw ang ilang gipangsulti, walay unod. Taliwala niining tanan moabot ang kalaay sa atong kinabuhi ug ang kauhaw sa tinuoray. Ang pan nga mikanaog sa langit - nga mao si Jesus - maoy maghatag og kahulogan sa atong kinabuhi.
Gidawat ug giayo ba nato og pag-usap-usap ang makabuhing pan nga mao ang lawas ug dugo ni Jesus?