DAKO ang posibilidad nga mapanday ang alyansa sa lokal ug nasyonal nga federalism movement nga mao ang CEMFED ug NAMFED ug ang Hugpong ng Pagbabago karong Augusto 21.
Espesyal nga dinapit man gud si Davao City Mayor Sara Duterte sa tigum sa League of Mayors of the Philippines (LMP) Visayas Cluster nga ipahigayon dinhi sa Sugbo.
Yawe nga personalidad sa maong tigum mao si Tuburan Mayor Aljun Diamante nga maoy LMP vice president for Visayas. Naila kini si Diamante nga maoy lig-ong haligi sa federalism movement sa Sugbo tungod sa CEMFED ug NAMFED.
Atong nasayran nga duna nay pasiunang mga istorya kabahin sa posibleng panag-alyansa sa CEMFED/NAMFED ug ang Hugpong.
Gani, si Konsehal Danny Dayanghirang sa Syudad sa Davao opisyal man sa NAMFED.
Tan-awn nato kon madayon ba kini.
Ato diayng pahalipay kang Mayor Diamante kay awardee ang lungsod sa Tuburan sa Cities and Municipalities Competitive Index 2018 Awardees.
Ika-14 nga awardee ang Tuburan sa tibuok nasud.
Gwen
Daghan ang nag-atang kanus-a kuno hubo-an sa gahum si Kong. Gwen Garcia tungod sa iyang pagdapig kang Speaker Bebot Alvarez ug kaso sa Ombudsman tungod adtong pagpalit sa luna nga gipanag-iya sa pamilyang Balili sa Syudad sa Naga.
Matod pa, wala dayon modapig kang Kong. Gloria Macapagal-Arroyo si Deputy Speaker Garcia niadtong adlaw sa State of the Nation Address (SONA) ni Presidente Rodrigo R. Duterte.
Mao nga giilisdan siya karon isip Deputy Speaker kang Kong. Art Yap sa Bohol.
Bisan pa man, wa gitaktak ni House Speaker Gloria Macapagal-Arroyo si Kong. Garcia gikan sa Kamara bunga sa desisyon sa Ombudsman. Gani, gihatag niini ang chairmanship sa Committee on Economic Affairs. Usa kini ka gamhanan nga komitiba sa Kamara.
Buot ipasabot, lig-on gihapon si Kong. Garcia.
Wala mapapas si Gwen isip usa ka major political contender alang sa pagka gobernador bisan pa man sa mga panghitabo sa kaulohan ug kining desisyon sa Ombudsman.
(@anol_cebu sa Twitter)