DAGHAN ang nakugang sa pagkasikop sa usa ka gikatahapang sakop sa Abu Sayyaf sa dakbayan sa Carcar niadtong Huwebes sa kaadlawon. Kinsa bay magtuo nga naa na diay magpuyo sa tugkaran ang usa ka gikatahapang sakop sa teroristang grupo.
Ang militar ug kapulisan mismo mipakagamay lang sa taho sa hulga sa teroristang grupo human mopagawas og travel advisory ang London nga nagpahimangno sa ilang mga national sa di una pagbiyahe sa pipila ka mga dapit sa Pilipinas, apil na sa duha ka mga dapit sa Sugbo.
Ang lalawigan sa Palawan nipahibawo nga dunay mga taho sa hulga sa mga terorista sa lalawigan.
Mismo ang kagamhanan sa mao nga lalawigan nag-awhag sa ilang mga lumolupyo nga magmabinantayon ang tanan aron di makahimo sa ilang dautang plano ang mga terorista. Gihimo kini sa kagamhanan sa Palawan bisan kon ang gisaligan sa mao nga dapit ang turismo sa way kabalaka nga kini maapektuhan.
Apan dinhi sa Sugbo, mahadlok ang kagamhanan nga mohisgot og terorista bisan kon sa tinuod, dunay hulga. Kini napamatud-an na niadtong Abril sa 2017 dihang nidunggo sa Inabangga, Bohol ang 11 ka mga sakop sa Abu Sayyaf.
Niawhag na ang nagkadaiyang mga nasod sa ilang mga lumolupyo nga di una mobiyahe sa southern Cebu kay dunay hulga sa Abu Sayyaf.
Nitumaw na ang taho nga tinud-anay nga ang usa sa mga target mao ang pipila ka mga dapit sa habagatang Sugbo, apan wa madayon mao nga sa Bohol unta sila managit.
Kon basehan ang estorya sa mga silingan ni Pelonio sa Carcar, di layo ang posibilidad nga tinud-anay nga siya may kalambigitan sa teroristang grupo bisan sa iyang edad. Mahimong siya pinanser ug tigplano, di combatant.
Unta, sama sa Palawan, di mahadlok ang kagamhanan unsay tinuod kay ang pagbutyag mas makatabang kay sa makadaut.