NAANGKON sa kagamhanan sa dakbayan sa Mandaue ang pasidungog isip Most Improved Localities sa Highly Urbanized Cities Category base sa Cities and Municipalities Competitive Index (CMCI) ning tuiga.
Ang Mandaue maoy 2nd placer sa maong pasidungog nga gipasiugdahan sa Department of Trade and Industry atol sa 6th Regional Competitiveness Summit sa Philippine International Convention Center (PICC) didto sa Pasay niadtong Huwebes.
Ang 1st placer nga gisundan sa Mandaue mao ang dakbayan sa Iloilo ug and 3rd placer mao ang Bacolod.
Di mominos sa 33 ka mga dakbayan sa tibuok nasud ang nagtigi sa maong kategoriya.
Gawas niini, ika- 13 sa Top 20 Overall Competitive ang Mandaue sa CMCI 2018.
Laing pasidungog nga nakuha niini mao nga kini ika-7th place sa Top 20 sa Economic Dynamism ning tuiga.
Ika-20th place sab ang dakbayan sa tibuok dakbayan sa nasud sa Government Efficiency category.
Sa pasidungog sayo ning semanaha, nagpabiling nidominar ang mga dakbayan sa Manila ug Quezon sa tinuig nga listahan sa prestihiyusong pasidungog.
“Rankings of Cities and Municipalities are based on the sum of their scores on 4 Pillars: Economic Dynamism, Government Efficiency, Infrastructure and Resiliency. Provincial rankings are based on population and income weighted average of the Overall scores of cities and municipalities under a province,” sumala pa sa website sa DTI.
Laing dakbayan sa lalawigan sa Sugbo nga nakadawat og pasidungog mao ang dakbayan sa Talisay nga 3rd placer sa Most Improved Component Cities category. JPP