KAPIN sa usa ka buwan human gipahunong sa kagamhanan sa dakbayan sa Lapu-Lapu ang operasyon sa City of Lapu-Lapu Allied Force (CLAF), ang kapulisan nanginahanglan og dugang pwersa aron moabag kanila sa pagpatuman sa balaod sa trapiko sa kadalanan.

Si Chief Inspector Jimmy Fortes, deputy chief sa Lapu-Lapu City Police Office- Traffic Enforcement Unit (LCPO-TEU), nibutyag nga 15 lang mga pulis ang nagsilbi sa iyang buhatan.

“Admittedly, dako gyud silag tabang sa atoa. Hopefully, if possible, mabalik ni Mayor Paz (Radaza) ang (CLAF) kay helpful kaayo sila sa amoa sa traffic,” ni Fortes sa dihang nahinabi sa mga tiggbalita.

Dugang niya nga dakog tabang kanila ang CLAF ilabi na sa ilang operasyon matag gabii batok sa mga molapas sa balaod trapiko.

Paambit ni Fortes nga pabiling hagit kanila ang mga traffic violators nga sagad mogara panahon sa kagabhion.

“Naa man gud usahay nga daghan kaayo ta madakpan sa gabii. The more nga gabii, the more nga manggawas ang katong mga walay lisensya, mga walay rehistro (nga motor),” esplikar ni Fortes.

Siya nagkanayon nga nidoble ilang trabaho tungod sa kakuwang sa kawani.

Kon hatagan og higayon nga mo-request og dugang pwersa gikan sa Police Regional Office (PRO) 7, si Fortes niingon nga mga 40 ka pulis iyang ipuno sa TEU aron mobantay sa lapad ug dako nga dakbayan sa Lapu-Lapu.

Apan ang gidaghanon magdepende gihapon sa desisyon sa hepe sa LLCPO nga si Senior Superintedent Limuel Obon.

Sa iyang bahin, giangkon ni Obon nga kuwang og pulis ang LLCPO ug alang niya mo-request siya og dugang tawo sa iyang buhatan.

Sa kasamtangan, adunay 300 ka personnel ang LLCPO. Ang angayng gidaghanon sa kapulisan nga ibutang sa usa ka dakbayan anaa sa 500.

“We are really short of personnel and that we have to maximize yet our current deployment strength,” dugang ni Obon.

Kahinumduman nga gipahunong ni Mayor Paz Radaza ang mga operasyon sa CLAF niadtong Hunyo 30 human niya masuta nga ang uban mga kawani niini nalambigit sa iligal nga kalihukan ug drugas.