DUL-AN usa ka libo ka mga layko ang ningpirma sa manifesto sa Commission on the Laity sa Archdiocese of Cebu diin nanawagan sila sa paghunong na sa sigeng patay nga nahitabo karon sa Sugbo.
Kagahapon atol sa Monthly Lay Caucus sa Commission on Laity, nihimo kini sa ilang “Spiritual Warfare and Call to Prayer to End Spate of Killings in Cebu.”
Human sa nagkadaiyang pag-ampo lakip na ang oratio imperata sa pagpamatay sa Sugbo, gipirmahan sa mga layko ang maong manifesto.
Ang pangu sa Commission on the Laity sa Sugbo nga si Fe Barino nihulagway nga alarming na kaayo kining padayon nga pagpamusil patay sa pipila ka mga tawo.
“Ang manifesto, ang tumong niana nga makadungog lang unta ang katawhan labi na gyud ang atong kagamhanan nga nagpakabana ta nga dili mahimo nga magpakahilom lang ta apan pinaagi sa atong dako nga pagtuo sa Ginoo nga naa gyud tay makab-ot nga kasaulabaran niining tanan,” pasabot ni Barino.
Dugang niya nga importante ang pag-ampo sa maong mga panghitabo nga pagpamatay.
“Importante ang mensahe nga this is the voice of the lay faithful, mga baruganan nga importante nga ang kinabuhi mapanalipdan. Walay gitumong, wala’y gibasol kon dili naay moabot nga kasulbaran niining tanan,” dugang ni Barino.
Lakip sa ilahang manifesto kining paghunong na sa extrajudicial killings isip gigamit nga pagsulbad sa problema sa drugas.
“Nga kami nagatawag sa kagamhanan sa paghunong na sa stratehiya nga “extrajudicial killing” aron sa pagsulbad sa suliran sa drugas ug sa paghimo og mga lihok aron masilotan sa hukmanan ang mga nangusog sa pagpakatap sa drogas, ug usab sa pagrehab sa mga adik sa pamaaging luwas ug Dyosnon,” tipik sa manifesto.