DUHA ang samdan atol sa sunog sa PC Hills, Barangay Apas, dakbayan sa Sugbo kagahapon sa buntag.
Samtang moabot sa pito ka mga unit sa apartment ang naugdaw samtang laing tulo ang nakan-an sa kayo.
Nadawat sa Cebu City Fire Department ang alarma sa sunog alas 4:54 sa buntag kagahapon ug nakontrolar kini sulod sa unom ka minutos ug na fire out alas 6:43.
Sa pakisusi sa kabomberohan gikan sa unit 7 sa gipuy-an ni SPO2 Charlyn Piedad, 48, ang maong kayo, apan sa pagkutlo ning balita, padayon pang gisuta ang rason niini.
Nakaangkon og ankle dislocation si Charlyn samtang nakaangkon usab si Nicole Piedad, 17-anyos, og 2nd degree burns sa wala nga kamot niini.
Anaa sa P300,000 ang danyos sa maong sunog. HBL