SA panahon karon daghan sa mga ginang sa panimay ang nangita og laing masapian gawas nga magsalig lang sa kinitaan sa ilang mga bana.
Aron masaparan ang panginahanglan sa panimalay og ubang bayranan sama sa tuition sa gipaeskwela nga mga anak, manikaysikay pagpangita og kapanginabuhian.
Sagad sa mga nilampos mao kadtong may tinagoan nga abilidad nga ilang nakat-onan gikan sa ilang ginikanan. Usa nila mao si Retchiel Fernandez nga taga sitio Banggaan sakop sa Barangay Cuanos sa lungsod sa Minglanilla.
Sa nagpangedaron pa siya og 8 anyos hitudloan na siya sa iyang ginikanan unsaon pagla og basket.
Ang industriya sa basket waiving maoy kasagaran nga tinubdan sa panginabuhian sa ilang dapit. Gawas nga kini i-deliver diha sa merkado sa Carbon, ang uban niini adto padung sa mga negosyante nga nag-export og mga handicraft sa mga nasod sa Uropa, Asya ug America.
Sa puhonan nga P1,000 hinayhinay nga napalambo ni Retchiel ang pagsud sa maong negosyo. Ang kinumpra niya nga tukog iyang gipangunayan pagla ug nagkadaiyang desinyo sa basket.
Kung daghan ang order ang ubang tukog adto padung sa iyang mga silingan nga iyang gikuntrata pagsiguro nga ma-deliver ang mga order sa tukma nga petsa.
Matod ni Retchiel, dako og natabang ang iyang nakat-onan sa itang ginikanan ning panahon nga nagka dako na sab ang iyang pamilya. Sa pangedaron nga 29 anyos upat na ilang mga anak sa iyang bana nga si Junjun nga usa ka security guard.
Sa panginabuhi nga ingon niini di sayon ang pagpangeta og merkado alang sa mas paspas nga produksyon. Samot na nga nagkamahal na sab ang materyales igo igo ra sab ang kitaon. Way problema sa materyales kay gilibutan man ta og daghangnpunoan sa lubi.
Ang mas lapad og lig-on nga merkado mas makapaikag pa sa uban pagsud sa maong matang sa negosyo. Wa ni kalainan sa nagkahinay nga produksyon sa mga sapatos nga hinimo sa Carcar City.
Sa akong namat-an og buot ang Carcar daan nang naila isip tinubdan sa pulido nga sandal og sapatos. Karon puwerte nang hinaya sa produksyon labi na kay agresibo na sab kaayo ang pagsud sa mga hinimo gikan sa China.
Ang ayuda gikan sa gobyerno sama sa pohunan og makinarya maoy kuwang ning bahina. Sama kang Retchiel dakong bentaha kong malingian sa gobyerno ang sama kaniya aron mapalapdan pa ang kahigayonan nga mapalambo ang maong industriya.
Ning panahon nga gidili na ang paggamit sa plastik isip putos sa kinumpra, nganongdi ta mobalik sa karaang panahon nga ang basket kanunay isambilay kon mangompra.