GIAPROBAHAN sa konseho sa syudad sa Sugbo, nga karon gidominahan sa mga sakop sa Bando Osmena Pundok Kauswagan (BOPK), ang usa ka resolusyon nga nagtugot ni Mayor Tomas Osmena sa pagpirma sa P18 bilyunes nga joint venture agreement (JVA) uban sa Universal Hotels and Resorts Inc. (UHRI) sa pag-develop sa kanhi Kawit Island.
Apan walo ka mga konsehal sa oposisyon midangop sa korte aron ideklarar nga nulo ang maong resolusyon ug ang laing resolusyon alang sa Binaliw landfill project. Lakip sa nipasaka sa maong kaso sila si Konsehal Jose Daluz III, Jocelyn Pesquera, Raymond Garcia, Pastor Alcover, Erik Miguel Espina, Joel Garganera ug Eduardo Rama Jr.
Bisan pa sa maong kaso gipirmahan ni Osmena ug sa mga opisyales sa UHRI ang joint venture agreement niadtong Biyernes.
***
Ang Kawit Island nahimutang sa South Road Properties (SRP). Niadtong 2015 ang syudad nibaligya og 45 ka ektarya sa SRP ngadto sa tulo ka mga higanting developers apan way development nga nahimo kay gustong bawion ni Osmena ang mga luna sa yuta gikan sa nakapalit nga developers.
Ang SRP aduna pay utang nga balig P2 bilyunes. Si Konsehal Daluz gusto nga hutdan og bayad ni Osmena ang maong utang ug, kon di man gani, i-convert ang utang ngadto sa pesos tungod sa nagsaka nga balor sa dolyar nga sa 2014 P44 ngadto sa dolyar ug karon P54 o P55 ngadto sa dolyar.
Apan alang kang Osmena di priority ang pagbayad sa utang. Matod ni niya adunay P12 bilyunes ang syudad sa bangko apan di niya hilabtan kay gikan kini sa illegal nga pagbaligya sa mga luna sa SRP.
***
Ang orihinal nga utang sa SRP gikan sa Japan Bank for International Cooperation mokabat og P2.8 bilyunes. Nagsugod pagbayad ang syudad sa maong utang niadtong buwan sa Agusto sa 2005, pero naa pay balanse nga P2 bilyunes.
Ang halin sa pagbaligya sa mga luna sa yuta sa SRP niadtong 2015 sobra pang ibayad aron maimpas ang maong utang. Apan gustong bawion ni Osmena ang mga luna sa yuta nga nabaligya kay matod pa illegal kini.