GILBERT TAJANLANGIT BAYOT
Poblacion, Cordova, Cebu
IDOLO nako ang akong Lolo. Tinahod siya sa bisan asang dapita sa among lungsod ug sa ubang dapit. Misikat si Lolo Gideon tungod sa kamaayo niyang motagik og mga balak ug mga sugilanon, true story man o fantasy.
Usa niana ka adlaw nga way klase, nanglimpiyo ko sa lawak sa akong apuhang magsusulat nga hagbay rang gi-serad-an kay wala na man gamita sukad siya namatay. Nakugang ako sa ako nang pag-abli. Pwerting ngiuba. Pero sa ako nang pagsud nabatyagan nako nga daw migaan ang akong lawas. Gipislit ko ang swits sa suga ug nabantang sa akong panan-aw ang daghang mga medalya sa bungbong. Ug sa may ulohan sa iyang katre naglaray sab ang nagkalainlaing tropeyo sa pagdaog ni Lolo sa bangga sa sinulatay.
Nahinumdom ko sa akong Lolo Gideon niadtong bata pa ko, singko anyos pa tingali ko. Dihay bangga sa sinulatay og balak sa among lungsod nga maoy opening salvo sa umaabot nga pista ni Senyor San Roque. Si Lolo maoy midaog sa unang ganti. Nadawat niya ang ganting salapi nga diyes mil pesos ug usa ka dakong tropeyo. Gikugos ko ni Lolo sa iyang wala nga kamot kay ang iyang tuo maoy nagkupot sa tropeyo.
Naputol ang akong paghandom dihang nabati ko ang singgit ni Lola Waning, asawa ni anhing Lolo. “Amil, pagdali diha! Kadugay ba nimong nanglimpyo anang kuwarto ni Lolo mo! Udto na!”
Wa nako tagda ang sangpit ni Lola. Giablihan ko ang usa ka hunos sa lamesa sulatanan sa akong Lolo. Maoy misugat sa akong mga mata mga sugilanon ug balak nga igtatampo pa. Dihay usa ka papel nga may nahisulat nga pagmahay sa iyang mabulukong obra sa buhi pa siya. Pipila pa ka gutlo nahuman ko’g limpiyo sa kuwarto ni Lolo.
Gipangutana ko si Lola Waning kon unsay namatyan ni Lolo Gideon.
“Konsumisyon ang namatyan niya, Amil. Wa niya madawat ang kapildihan sa katapusan niyang apil sa tigi sa sinulatay nga gipasiugdahan sa Dagang, Inc.. Usa siya ka ‘hall of famer’ apan wa siya modaog sa balak ug sugilanon nga iyang gisalmotan, bisan og ‘consolation prize’ na lang unta. Gikasagmuyo niya ang tanan ug didto nagsugod nga nawad-an na siyag gana,” saysay ni Lola Waning nako. “Ug gipasagdan na lang niya ang iyang kaugalingon.”
Wa nako damha nga gikahibalag ko ang mga magsusulat nga suod sa akong apuhan. Gidasig ko nila ko nila sa pagpanulat. Usa na ka tuig nga ako nagsulat. Napatikan na kog balak ug sugilanon sa Bismag ug Super B. Pero nagtuo ko nga di nako malabwan ang akong Lolo.
Usa ka adlaw nagkita mi si Tekyo nga kauban namo sa pundok sa mga tamsi pang mga magsusulat sa among lungsod. Ang among mga kauban mao sila si Maymay, Sagoksok ug Marvin.
“Bro Tekyo, naay bangga sa sinulatay og sugilanon sa Dagang, Inc. Mangapil ta. Wala may mawala nato og di ta kadaog. Pang-eksperyens lang!” giagni ko siya
Gisultihan sab nako silang Maymay, Sagoksok ug Marvin. Ug nangapil mi.
MORAG mga abogado ang upat ko ka mga higala nga may tambungan nga husay sa Hall of Justice, didto sa ‘venue’ nga himoan sa kombensiyon sa mga sakop sa Dagang, Inc. Nag-okupar kami og usa ka lamesa sa kilid sa ‘stage.’
Dihang gitawag na tagsa-tagsa ang mga mananaog nahisagmuyo ako. Di ko katuo sa akong nakita, kay sa di pa tawgon ang ngalan sa mananaog, kini mobarog nang daan, morag nakahibawo nga siyay midaog. Mohata-hata pa. Nakalitan ko sa maong talan-awon.
“Tek, uli na ta. Gabii na. Layo pang ato. Motabok pa ta’g lawod.” giingnan ko si Tekyo.
Sa atbang nasiplatan nako si Maymay nga nagkibot-kibot ang baba ug nagpiyong ang mga mata, morag nag-ampo nga makadaog. Kalit miduol si Sagoksok ug mihunghong nako nga manguli na.
“Sus, paita banggaa, mga abay! Wa ra bay refund ang atong pleti!” ni Tekyo nga nagkulismaot.
Si Marvin nga nagpakahilom lang kaganina misulti, “Abi ninyo, way mabasol ani. Ato mang kabubut-on nga mangapil. Way nagsugo nato nga moapil gyud. Ang importante, atong nahimamat ang atong mga idol nga mga magsusulat!” (KATAPUSAN)