SA labing unang higayon ang replica sa imahe ni Senior Sto. Niño, nilabang sa isla sa Olango, dakbayan sa Lapu-Lapu City kagahapon.
Nigikan ang imahe sa Basilica Minore del Sto. Niño, Cebu City sa udto padung sa Lapu-Lapu subay sa unang taytayan.
Ang convoy nilahos sa Movenpick wharf (karaang Hilton), Punta Engaño ug gisakay sa barge nga Jomalia nga modunggo sa Sta. Rosa wharf, Olango diin mag-atang nang daan ang mga deboto.
Ang imahe moestar sa isla sud sa tulo ka adlaw ug nagkadaiyang kalihokan ang giandam sa organizing committee nga gipangulohan ni Lapu-Lapu City Mayor Paz Radaza.
Si Radaza nagkanayon nga kahatagan og kahigayonan ang mga residente sa isla nga makakita sa imahen ilabi na nga ang replica maoy nay miduaw nila, inay nga sila maoy mobiyahe paingon sa Basilica.
“Murag tuyokon ang tanan barangay sa mainland Olango, after ana misahan,” tipik sa pamahayag sa Mayor.
Ang pagbisita sa imahen nauyonan lang sa mga kadagkuan sa Basilica human nga taga-isla dugay nang nangandoy nga moduaw ang Niño sa ilang dapit.
Gibana-bana nga liboan ka mga deboto ang mosalmot sa religious activity nga tagsa rang mahitabo sa Olango.
Gani ang Lapu-Lapu nihangyo og augmentation force sa Police Regional Office (PRO)7 gawas sa personnel sa city police office sanglit di kalikayan nga mohamag ang mga deboto ngadto sa urna, ingon man mapatunhay ang kalinaw atol sa maong kalihokan. (Ma. Devorah Taneo USJ-R Intern)