HUMAN giabswelto sa Cebu City Prosecutor’s Office si kagawad Jessielou Cadungog sa kasong murder, karon ang iyang problema mao ang seguridad.
Gumikan niini, si Mayor Tomas Osmeña niingon nga adto na niya pakatulgon si Cadungog kinsa maoy vice president sa Oriental Port and Allied Services Corporation (OPASCOR) didto sa iyang pinuy-anan.
“Captain Cadungog is sleeping in my house and he is welcome to stay here for as long as he likes,” tipik sa post ni Osmeña didto sa iyang social media page.
Si Cadungog ug Osmeña suod nga higala bisan wa pa sa pulitika ang kanhi barangay kapitan sa Tejero sanglit ang mayor sa dakbayan sa Sugbo maoy responsabli sa paglambo sa Opascor nga maoy iyang gikonsidera nga "bailiwick".
Ang mayor niingon nga gipamatud-an na sa piskal nga inosente si Cadungog sa kamatayon ni PO3 Eugene Calumba dihang gipusil kini sa bodyguard ni Cadungog nga si William Macaslang sanglit nagtuo siya nga ambusan siya.
“Let it be known that even the justice system has acknowledged that the leadership of PRO-7 are liars,” padayag sa mayor.
Gihulagway ni Osmeña nga sapagkakaron, lisod ang ilang kontra kay gawas sa mga kriminal apil na ang tigpatuman sa balaod.
“We are dealing with a very dangerous enemy, because this time, it is not just the criminals, it’s the people who are supposed to protect us from criminals,” dugang sa mayor.
Apan iyang gipasalig nga himuon niya kutob sa iyang mahimo mapanalipdan lang ang katawhan.
“But I will not allow them to harass our people. And I will absolutely not allow them to endanger the Cebuanos,” matod ni Osmeña. (PAC)