HUMAN mapakyas sa unang pagpa-bidding sa speed boat, ang Provincial Health Office (PHO) mopabuhat og pasiunang duha ka mga pump boat nga magsilbi nga ambulansya sa kadagatan alang sa mga isla sa Camotes ug Bantayan.
Si Dr. Rene Catan, pangu sa PHO, niingon nga mahimo ra i-negotiated bidding ang pagpalit sa kagamhanan sa lalawigan sa Sugbo og pump boats kay ubos sa P1 milyon ang kantidad niini.
“Kon moagi ta og regular process of bidding, it would take at least six months pero wala man ta mawala sa atong plano nga mopabuhat og sea ambulance,” dugang niini.
Nana silay gikasabot nga tigbuhat og mga pump boat didto sa Leyte nga maoy mobuhat sa desinyo alang sa paliton nga pump boats nga maoy moserbisyo sa gagmayng mga isla.
Si Catan nibana-bana nga mobalor og P500,000 ngadto sa P800,000 ang matag usa ka pump boat.
“Ang kagwapo man gud sa pump boat kay gibuhat man ni sa ubang probinsya Palawan, Masbate. Ang nakagwapo pud sa pump boat kay minos ang iyang maintenance, daghan ang kahibawo mopadagan, unya ang pisa very much available,” pamulong sa doktor.
Ang pasyente nga isakay dinhi kay kuyogan og nars o medical personnel gikan sa district hospital paingon sa dagkong tambalanan sa Cebu mainland.
Pabutangan usab kini og cabin aron luwas ug di mabasa ang pasyente samtang maglawig sa kadagatan diin 10 ka mga tawo ang masud.
Ang pump boats sangkapan usab og mga tambal, oxygen, defibrillator, ambu bag, ug ubang kagamitan sa pagtambal nga modagan sa gikusgon nga 10-12 knots diin duha ka mga makina ang gamiton.
Pabutangan usab kini og wang-wang ug global positioning system (GPS).
Tinguha ni Catan nga sa di pa ang Pasko ning tuiga mahuman ug magamit ang duha ka mga pump boat nga magsilbing sea ambulance.
Nasayran, gipa-terminate ni Gobernador Hilario Davide III ang kontrata alang sa paliton unta nga duha ka speed boats human napakyas ang supplier paghatod niini sa gitakda nga panahon. (SCG)