LIBRE na ang pagpauli sa mga Overseas Filipino Workers (OFW) kinsa makasugat og problema sa ilang pagpanarbaho didto sa gawas sa nasod.
Kini ang gipadayag ni Hans Cacdac, administrator sa Office of the Workers Welfare Administration (OWWA), atol sa gipahigayong public hearing may labot sa House Bill nga giduso ni Kong. Jesulito Manalo, sa Angkla Partylist.
Si Manalo gusto nga masayod kon giunsa paggasto sa OWWA ang binilyon nga pundo alang sa ilang buhatan nga nakasentro sa mga OFW.
Ang OWWA adunay P2.8 bilyones nga budget alang sa tuig 2018 ug nangayo sila og di mominos P5 bilyones alang sa pundo sa ilang buhatan sunod tuig.
Ang pagpapauli sa mga OFW nga libre ilawom sa ilang reintegration program nga gitawag og Balik Pilipinas, Balik Hanapbuhay diin sa ilang pagpauli, hatagan sila og livelihood assistance sa buhatan.
Atol niining pagsuwat, wa pa mahibaw-i sa OWWA kon pila na ka gatos ka mga OFW ang ilang libreng napapauli gumikan sa bati nga employer, pagpangabuso sa ilang amo ug uban pa.
Gawas niini, gipadayag usab ni Cacdac nga padayon silang modawat og mo-assess sa mga loan sa kanhi mga OFW kinsa gustong moapil sa ilang programa nga way collateral kon di ang pagpakita sa imong plano sa negusyo.
Makahuwam ang usa ka OFW hangtod P1 milyon depende sa performance sa imong nahiunang loan diin daghan na sa mga Sugbuanon ang nahimong malampuson sa ilang negusyo human sila nanginabuhi sa laing nasod. (PAC)