GIBAROGAN ni Toledo City Mayor John Henry “Sonny” Osmeña nga nadesisyonan na sa Court of Appeals ang iyang kaso ug dili na siya suspendido.
Siya nikomento niini human nimando si Department of Interior and Local Government (DILG) 7 officer-in-charge Maria Loisella Lucino nga pabilin nga ipatuman ang desisyon sa Office of the Ombudsman bisan og nihukom ang Court of Appeals nga naglimpyo sa pangan ni Osmeña sa mga alegasyon nga nagdumili kini pagpagawas sa mga bahin sa real property tax sa Barangay Daanglungsod.
“I have been restored to my position and so therefore, I am the mayor of Toledo.." pulong ni Osmeña sa Superbalita Cebu kagahapon dihang gikuhaan sa iyang habig kabahin sa ipatuman nga nahabiling upat ka buwan sa iyang usa ka tuig nga preventive suspension sa gipahamtang sa Ombudsman.
Sumala sa DILG 7 chief magpabilin ang suspension ni Osmeña kay wala pa maresulbar sa CA ang mosyon sa ombudsman ug wala usab kini moisyu og injunctive relief.
Apan alang ni Osmeña naresolbar na sa CA ang motion for reconsideration sa Ombudsman ug pinal na ang iyang kaso. (SCG)