SA kinatibuk-ang 84 ka mga proyekto nga apil sa Annual Investment Plan (AIP) sa kagamhanan sa siyudad sa Toledo nga kinatibuk-ang nagkantidad og P1,498,552,796.62, lima lang niini ang hingpit nga napatuman hangtod sa Disyembre 31, 2017.
Samtang ang laing 30 ka mga proyekto o 36 porsyento sa targeted projects nga kinatibuk-ang nagbalor og P461,593,755.22 ubos sa kasamtangang tuig nga appropriations sa 20 porsyento sa Development Fund, ang wala mapatuman gumikan way program of works.
Sa 84 ka mga proyekto, duha ang partially napatuman, 12 ang nagpadayon ang paghuman, ug 35 ang nipaubos sa procurement process.
Ang lima nga napatuman na mao ang pagpalit og medical equipment nga nagbalor og P5 milyones, P752,400 nga mga uniporme sa Central Visayas Regional Athletic Association (Cviraa) Meet, P35 milyones nga ekipo alang sa engineering ug information communication technology ug P25 milyones nga flood ug erosion control projects.
Apil sa wala pa mapatuman ang P200 milyones nga community center, P40 milyones road rehabilitation o pagpaayo sa mga karsada gikan sa mga sitio Luas-Kalibayan-Lobo, Barangay Matab-ang, road opening sa Malubog Diversion Road, P27.1 milyones nga pagpalambo sa solid waste collection services, pagnindot ug pagpaayo sa mga karsada sa siyudad, pagpalit og kagamitan isip ayuda sa Department of Education ug Technical Education and Skills Development Authority, paghatag og mga proyekto sa kabarangayan ug ubang ayuda.
Matod sa mga state auditor ang kaubos sa porsyento sa accomplishment nagagumikan kay kuwang sa insaktong monitoring sa pagpatuman sa mga sa maong mga proyekto, diin nahikawan ang mga benepisyaryo o mga konstituwente sa mga benepisyo nga makuha gikan niini.
Sa 2017 annual audit report, nahibaw-an ang pipila sa mga rason sa wa kapakyas pagpatuman sa mga proyekto nga naglakip sa kakuwang sa plan and program of works (POWs) ug pag-execute sud sa gitakda nga panahon ubos sa Annual Procurement Plan (APP). (SCG)