NIPASABOT ang taas nga opisyal sa Barangay Compostela, lungsod sa Alegria kabahin sa paghatag og bahin sa usa ka asosasyon sa mga mag-uuma gikan sa kita sa canyoneering operation sa Kanlaob River.
Sigon ni Compostela Barangay Kapitan Joseph Redula nga dihang gituki nila sa konseho sa barangay ang Ordinance No. 3 diin nalatid sa Section 6 ang binahinay sa net proceeds sa canyoneering operation, ilang nauyonan nga dili nganlan ang pangan sa people’s organization nga makadawat og otso porsyento.
Matod niya, ang Compostela Farmers’ Association (Comfa) lang ang bugtong P.O. nga accredited ug rehistrado sa ilang barangay nga dul-an na sa 10 ka tuig.
“Lisod kon ang ordinance sa barangay butangan og name sa P.O. What if ma-dissolve na? Kon mawala na, ang ubang mo-exist unya nga P.O. dili na makadawat,” dugang sa kapitan sa Superbalita Cebu.
Pagpasabot kini sa kapitan sa pagkwestyon sa COA sa basehanan sa pagdawat sa Comfa og otso porsyento nga bahin gikan sa koleksyon sa canyoneering operation.
Gibanabana ni Redula nga mo-average og P40,000 matag adlaw ang kita sa canyoneering operation sa Kanlaob River sa ilang lungsod.
Si Alegria Mayor Verna Magallon namahayag nga gihinayhinayan nila karon nga ang P.O. na ang modumala sa mga tourist destination sa ilang lungsod nga mao usab ang gitinguha sa provincial government.
“Hopefully, in the coming months ang P.O. na ang mo-manage. Mas maayo kon ang P.O. ang modumala,” dugang sa mayor. (SCG)