HUMAN gilubong kagahapon si SPO1 Roderick Balili, gipasalig sa Police Regional Office (PRO) 7 nga madawat sa pamilya sa pulis ang benepisyo nga alang kanila.
Si SPO1 Balili, kinsa namatay human giingong “accidental firing" sa iyang kauban sa operasyon," gilubong sa Pardo Public Cemetery.
Si Fr. Gerardo dela Victoria maoy nangulo sa santos nga misa atol sa lubong ni Balili.
Gawas sa pamilya ni Balili anaa usab ang mga higala niini, paryente, ug mga kaubanan sa Philippine National Police ug sa PRO 7.
Gihatagan og police honors si Balili diin sa wala pa kini hingpit nga gilubong gihimo ang 21 gun salute dayon ang flag nga naa sa lungon niini gitugyan sa iyang kapikas sa kinabuhi.
Emusyonal ang mga tawo nga mihatod sa lubong ni Balili hilabi na ang pamilya niini ingon man ang iyang asawa kinsa wala makapugong sa paghilak og maayo dihang gidawat ang flag sa nasod isip timaan sa maayong pagserbisyo ni Balili sa han-ay sa kapulisan.
Si Sr. Supt. Ronald Oliver Lee, pangu sa directorial staff sa PRO 7 maoy nirepresentar sa direktor sa rehiyon, nipasalig nga madawat ang tanang benepisyo sa pamilya ni Balili. (HBL)