DUL-AN sa 400 ka mga pari sa tungatungang Kabisay-an ug kasikbit nga lalawigan ang magpundok sa Parklane Hotel, siyudad sa Sugbo sa dakong kalihokan nga gitawag og “Panagtigom” sugod ugma hangtod sa Biyernes.
Sa panagtapok, nga magsilbi usab nga tinuig nga retreat sa mga pari, gipaabot ang pag-umol og Code of Conduct for the Clergy.
Sa opisyal nga mantalaan sa artsidyosesis sa Sugbo, ang Bag-ong Lungsoranan, nalatid nga ang code of conduct maoy mogiya sa mga pari mahitungod sa ilang diwa ug aksyon nga pagapuy-an ug ipatigbabaw isip konsagradong alagad ni Kristo ug Simbahan.
Usa ka dokumento ang pagatun-an ug pamalandongan panahon sa retreat ug ang maumol nga mga lagda sagupon sa mga pari nga sakop sa Sugbo ug suffragan nga mga diyosesis niini.
Ang kalihokan lahi kon itandi sa ubang katuigan, kay karong tuiga usa ka tiningob nga retreat ang salmotan sa kaparian gikan sa artsidyosesis sa Sugbo ug gikan sa suffragan nga mga diyosesis niini nga mao ang Tagbilaran ug Talibon sa Bohol, Dumaguete sa Negros Oriental, Siquijor ug Maasin sa Leyte.
Dungan kini nga ipahigayon sa mga diyosesis alang sa Year of the Clergy and Consecrated Persons. (SCG)