NIHANGOP ang Police Regional Office (PRO) 7 sa pagluwat og Oratio Imperata sa Archdiocese of Cebu sa miaging semana sa pagtapos sa sunodsunod nga patay sa Sugbo.
Ang Oratio Imperata, sagad ipagawas panahon sa kalamidad ug emerhesniya, usa ka dugang o espisyal nga pag-ampo sa dili pa motapos ang misa ug hunongon kini kon moluran na ang kriminalidad.
Si Supt. Reyman Tolentin, tigpamaba sa PRO 7, nipasalig nga ang kapulisan naningkamo usab nga matapos ang patay sa Sugbo.
“Maayo na kay para ang mga tawo mag-ampo aron magnalinawon ta...” matod ni Tolentin.
Dugang ni Tolentin, ang kapulisan mas madasig kon i-apil sa simbahan sa espisyal nga pag-ampo nga mapanalipdan sa ilang pagserbisyo ug pagsakripisyo sa ilang kinabuhi alang sa pagmintinar sa kahusay ug kalinaw sa Sugbo.
“Apilon unta nila sa ilang pag-ampo para at least malikay pud sa disgrasya atong tropa,” dason ni Tolentin.
Daghang kaso sa patay sa Sugbo ug sagad niini wala pay kasulbaran sa pagkakaron, lakip sa pagpusil sa duha ka mga ahente sa Philippine Drug Enforcement Agency 7, duha ka police officers ug daghang gidudahang drug personalities.
Sa Oratio Imperata, ang kapulisan wala naapil sa pag-ampo isip nag-unang sanga sa kagamhanan sa pakigbatok sa krimen ug druga.
Samtang sensitibo ang liderato sa Philippine National Police (PNP) sa isyu sa extra judicial killings (EJK), diin ilang gihimakak kini nga alegasyon.
Gipadayag sa PNP nga nag-unang tuyo sa kapulisan mao ang pagtaral sa hukmanan sa mga suspek, apan niangkon sa pipila ka kaso sa patay human giunhan sila sa pagpamusil sa ilang legal nga operasyon batok sa gidiling druga. (JOB sa SunStar Cebu, dugang ni RRM)