USA ka bonggang pyrotechnic show nga gibidahan og daw usa ka pag-ulbo sa bulkan ang nagpahayag sa kagabhion sa opening ceremony sa 18th Asian Games sa miaging gabii sa Jakarta, Indonesia.
Sa usa ka talagsaong panghitabo, ang presidente sa Indonesia nga si Joko Widodo misulod sa Gelora Bung Karno Stadium nga nagsakay og motorbike paingon sa stage.
“We are proud, we are honored by the arrival of the special guests from 45 countries,” pa,ahayag ni Widodo sa 50,000 ka mga tawo nga nagtapok sa samang venue nga gisugdan sab ang kompetisyon niadtong 1962.
“During the 18th Asian Games we, the nations of Asia, want to show that we are one in brotherhood.”
Sa pamahayag ni Widodo kabahin sa panag-inigsuonay sa mga nasod sa Asya, nagsilbeng usa ka maayong ehemplo ang dungan nga pagpaso sa mga atleta sa North ug South Korea ubos sa usa ka bandera.
Giabibahan sab ang pagpaso sa Palestine contingent ug Kuwait delegation nga nakasalmot human malibkas ang ban sa Olympic movement, tulo na ka mga tuig ang nakalabay.
Si Olympic Council of Asia (OCA) president Sheikh Ahmad Al-Fahad Al-Ahmed Al-Sabah mapasigarbuon nga nakabalik na ang iyang nasod sa kompetisyon.
“We are proud that the Kuwaiti athletes after so many years are participating under the Kuwaiti flag ... to complete the 45 flags of all our members,” matod niya.
Ang sentro sa atraksyon mao ang hinimo nga dakong bulkan nga gialirungan og 3,600 performers nga nanayaw sul-ob ang maanindot ug colorful costumes.
Ang kulbahinam sa seremonya mao ang pagdala ni kanhi Olympic badminton champion Susi Susanti sa torch paingon sa tumoy sa bulcan aron dugkatan ang fireworks.
Moabot sa 9,000 ka security personnels ang nagbantay sa stadium nga naka-host sab kaniadto nila ni Pope John Paul II, Michael Jackson, Bon Jovi ug Guns N’ Roses.
Aron maseguro ang kahapsay, nagkanayon ang mga nag-organisar nga 100,000 ka mga police ug military personnels ang gipakatap sa palibot sa gawas sa stadium.
Moabot ngadto sa 13,000 ka mga atleta sa tibuok Asya ang magkombati ning matag upat ka mga tuig nga kompetisyon. (Reuters, ESL)