SA dayong human sa 12-round nga away, daw usa ka bomba ang gibuhiang kumo ni Christian “The Bomb” Araneta nga nagpakuyap kang Jerry Tomogdan sa main event sa “Double Rumble” boxing promotion sa miaging gabii sa Mandaue City Sports Complex.
Sa kadaugan, naangkon ni Araneta ang World Boxing Council (WBC) Asia Silver light flyweight title.
Kontrolado ni Araneta ang kinatibuk-ang away apan hangtod sa ika-12 ug katapusang round, naa kanunay si Tomogdan sa iyang atubangan nga namasin nga makatayming og kinumo nga makapausab sa dagan sa estorya.
Apan sa nahabiling duha na lang unta ka mga segundos, usa ka eksplosibong left uppercut ang gibuhian ni Araneta nga maoy nagpahagba ni Tomogdan deretso sa sawog.
Sa dihadiha dayon, ang beteranong referee nga si Tony Pesons miwarawara sa iyang mga kamot ug daling mitawag sa ring doctors nga sila si Jose Unabia ug Rene Bonsubre aron ipasusi ang kahimtang ni Tomogdan.
Nakuyapan si Tomogdan ug gibanabanang mga kapin pa sa 10 ka mga minutos una kini nabalikan sa panimuot.
Si Araneta, kinsa usa sa pambatong mga boksidor sa Omega stable, misaka sa 16=0, 14KOs nga rekord samtang si Tomogdan natagak sa 25-10-4, 3KOs nga baraha.
Sa co-main event, miposte si Jaber Zayani (15-0, 8 KOs) sa France og split decision nga kadaugan batok sa Pinoyng si Eduardo Mancito (16-9-2, 9 KO’s) aron angkunon ang bakanteng World Boxing Organization (WBO) Oriental super featherweight title.
Nimuigna sab og split decision nga kadaugan si Jobert “Little Pacman” Alvarez (18-2-2, 7 KO’s) sa General Santos City batok kang Gerpaul Valero (22-22-4, 16 KO’s) sa Mandaue City.
Nikawat og atensyon sa promosyon mao ang majority decision nga kadaugan ni Kawelo Alcos (2-0, 1 KO) sa Hawaii, U.S.A. batok mao pa la’y pagsaka sa professional rank nga si Patrick Dakay sa Cebu City.
Sa lain pang mga away, ningdaog sila si Adrian Lerasan batok kang Pociano Remandiman (TKO 7), Marjon “The Journey” Piencenaves batok Jeffrey Stella (UD), Carlo Bacaro batok Matthew Fondales (TKO 1). (ESL)