ANG tribung Obu Manovu ang nanguna sa Dula Kadayawan 2018 nga giduwa didto sa People's Park sa Davao City.
Human ang unom sa napulo ka duwa nga gihimo, ang Obu Manovu, mitala og kinatibuk-ang 40-puntos lakip ang tulo ka puntos sa siklot, 9 sa solopot, 6 sa pana (bow and arrow), 1 sa kakasing ug 13 sa totaringki.
Ikaduha ang tribung Ata nga mitapok og 32-puntos samtang Bagobo Klata (28), Matigsalog (17) ug Bagobo Tagabawa (16) ang misunod sa tulo ka puwesto.
Sila 2018 Kadayawan Festival Executive Committee director Gatchi Gatchalian, Davao City Tourism Operations Office chief Generose Tecson, Davao City administrator Zuleika Lopez ug Sports Development Division-City Mayor's Office (SDD-CMO) chief Michael Denton Aportadera ang nangulo sa pag-abli sa seremonya.
Anaa sab ang mga lider sa tribu ug chieftains sa 11 ka tribu.
Samtang ang tribung Moro lakip ang Iranun, Kaagan, Maranaw, Maguindanaon ug Sama nagtigi sa sipa salama, sipa sa manggis, ug tug of war.
Ang mahimong overall champion mouli og premyong P80,000 samtang ang ikaduha, ikatulo ug ikaupat makadawat og P70,000, P50,000 ug P30,000 sa maong han-ay.
Samtang sa Moro Games makakuha og P15,000, P10,000 ug P8,000 sa unang tulo manguna samtang ang ikaupat ug ikalima dunay P2,000 matag usa. (ABM)