SECTIONS
Tuesday, September 18, 2018
SUPERBALITA DAVAO

Live-in partner girapido

MACO, Compostela Valley -- Blangko pa ang kapulisan sa Maco Municipal Police Station sa pagpusil sa live-in partner didto sa Purok 3, Sitio Sagaysagay, Barangay Elizalde, alas 7:00 sa buntag, Sabado.

Mga biktima giila nga sila Armie Bustamante, 43-anyos, kinsa talandugon ang kahimtang sud sa ospital ug si Alona Logronio, 44-anyos, kinsa, dead on the spot sa hitabo.

Segun sa imbestigasyon sa kapulisan nagluto alang sa ilang pamahaw si Armie samtang ang iyang kapuyo nga si Alona moadto na unta sa ilang uma.

Duha ka wa mailhing mga mamumuno ang kalit nga mibutho ug gipusil si Alona sa madaghang higayon diin giapil sab og pusil si Armie.

Midagan ang biktima aron luwason ang iyang kaugalingon ug nangayo'g pakitabang sa mga silingan samtang ang mga mamumuno paspas nga miiktad paingon sa wa matino nga direksyon.

Daling gidala ngadto sa Davao Regional Hospital sa Tagum City ang biktima alang sa medikasyon samtang ang patay’ng lawas sa babaye gidala ngadto sa Landa Funeral Homes sa Mawab.

Wa pa sab gikabutyag sa kapulisan ang ugat-hinungdan sa pagpamusil.

Lawom nga imbestigasyon ang gihimo sa kapulisan sa dapit aron maila ug masikop ang mga responsable.


VIEW COMMENTS