GIPUTLAN diay sa ulo ang usa ka basurero nga missing sud na sa usa ka semana.

Ang iyang lawas ingon man ang ulo nga giputos og plastik gisud sa sako ug gilabay sa Inayawan dumping site, siyudad sa Sugbo.

Click here for stories and updates on the Sinulog 2010 Festival.

Napalgan kini pasado alas 6 sa miaging gabii.

Ang biktima giila nga si Gaudencio de la Cruz, 49, nagpuyo sa dapit, usa ka scavenger samtang ang suspek giilang si Edgardo Abangan, 30, iyang kauban ug higala.

Si Abangan gidudahan nga maoy killer kay siya ang katapusang nakita nga gikauban sa inom sa biktima.

Si PO2 Dario Manatad sa Homicide Section sa Cebu City Police Office (CCPO) nagkanayon nga si Orly Caniba, usa ka akwani sa Department of Public Services (DPS) ni-inspection sa mga basura nga gilabay.

Samtang nagsusi, iyang napanimahoan ang patay nga iyang gituohang usa lang ka hayop.

Apan nakurat siyag maayo dihang iyang nakita ang bitiis sa usa ka tawo nga nigimaw sa usa ka sako.

Iyang gipahibawo ang mga barangay tanod sa Inayawan sa iyang nakit-an ug ila sab dayong gipahibawo ang kapulisan.

Gihiling sa kapulisan ang sako.

Didto ilang nakaplagan ang lawas sa biktima ingon man ang pinutol nga ulo nga gisulod sa plastic.

Ang kabanay ni De la Cruz ni-report sa Pardo police sa milabayng semana nga wa na nila igkita ang biktima.

Katapusang nakit-an ang biktima nga nakig-inom kang Abangan.

Gipangita sa kapulisan si Abangan sa ilang balay, apan ang iyang inahan ug amahan niingon nga nibiya ang suspek sukad pa niadtong milabayng Sabado ug wa na gyud igkita.

Matod pa ni Manatad nga hait ang hinagiban nga gigamit sa pagputol sa ulo ni De la Cruz tungod sa agi sa samad.

Ang anak usab ni De la Cruz positibo nga niila nga ang lawas iya sa iyang amahan nga wa na igkita sulod sa usa ka semana.