SUPERBALITA CAGAYAN DE ORO

Todino: Gamhanan unta kaayo

Pro Bono

NIADTONG Agosto 14, mipagawas og pamahayag si Presidenti Rodrigo Duterte. “Gikapoy nako. Dili na nako mahimo. Akong angkonon ngadto sa katawhan nga napakyas nako sila. Busa pangita nalang mo og hulip kanako.”

Gusto na ni Duterte mopauli sa Davao, biyaan niya ang Malacanang kay wa gyud magsilbi iyang kampaniya batok sa ginadiling drugas ug korupsiyon sa Pilipinas.

Matod ni Duterte, nagkadako ang mga shipment sa illegal nga drugas nga nasakmit sa awtoridad. Nagtuo ang presidenti nga nagkagrabe ug mosamot pa gyud ang problema sa drugas ug pangurakot sud sa iyang termino. “Dili na nako kaya.”

Gibutyag kini ni Duterte atubangan sa mga negosyanti atol panagtigum didto sa Malacanang dihang gilusad ang programa nga “Pilipinas Angat Lahat.”

Nganong diha man gyud niya unang gipahibaw sa mga negosyanti? Tungod ba kay nasayod gyud siya sa panghunahuna niining mga negosyanti nga kon magpabilin kining klase sa problema, apektado usab ang paglambo sa ekonomiya sa nasod?

Kining mga magpapatigayon dako uyamot sila og papel sa kauswagan sa nasod. Apan, kon pakyas ang gobiyerno sa pagpatunhay sa kahapsay ug kalinaw, walay negosyanti nga molahutay sa ilang patigayon.

Unsa bay reaksiyon sa katawhan sa pamahayag ni Duterte. Tingali ang kadagkoan sa Simbahang Katoliko nagpista. Dili man gud ikalimod nga wa gyuy maayong relasiyon karon ang simbahan ug ang presidenti.

Pero, kon buot hunahunaon maisip baya gyud nga dakong hagit kini sa simbahan. Sa ilang pagkasayod sa kalapad sa problema sa drugas ug korupsiyon, kaniadto pa unta mitabang sila sa kampaniya sa gobiyerno.

Epektibo kaayo ang simbahan kon sila mismo mohingusog sa kampaniya batok sa drugas ug korupsiyon. Gamiton lang nila ang pulpito ug iwali kanunay ngadto sa parokyano ang dautang epekto niini.

Sa tinuod lang, kon napasantop unta ang mensahi mahitungod sa “kaluwasan” nan, seguradong mominus kining problema sa atong palibot. Ngano man?

Kon masayod ta nga giluwas ta pinaagi sa dugo ni Kristo diha sa paglansang sa krus, masabtan nato nga dili na kita mismo maoy tag-iya sa atong lawas kay gilukat na kini ni Kristo didto sa Kalbaryo.

Tungod kay tinugyanan lamang kita sa atong lawas, busa wa tay katungod sa pagpasipala ug pag-abuso niini. Hinuon ato kining atimanon pag-ayo subay sa iyang kabubot-on.

Niining puntoha, dili nato butangan og mahugaw atong lawas nga makadaot sama sa drugas, ug dili sab ta magpakasala sama sa pagpanglimbong ug pangurakot ug uban pang kadaotan.

Kon kini ang kanunay i-wali diha sa pulpito, ang mga tulak ug drug lord, o drug user nga misimba, dunay purohan nga makahinuklog ug mag-usab pa sa ilang dalan.

Apan, unsaon nato pagsalig sa atong kadagkoan sa simbahan nga wa man gani sila makabadlong niining sugal, inom ug panigarilyo kay sila man mismo naghimo sa maong butang.

Gamhanan unta kaayo kining simbahan sa kampaniya sa illegal nga drugas ug korupsiyon nga wala maapas sa kampaniya sa administrasiyon ni Duterte kon lamang gituman sa simbahan ilang responsibilidad.

Busa kon mosurinder na gyud si Duterte, kinsa pa man atong sandigan nga mopadayon sa maong kampaniya? Ang simbahan? Mga negosyanti? O politiko?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph