GIPANINGKAMOTAN sa Regulatory and Complaint Board (RCB) nga hingpit na nga mawala ang mga porn sites sa tanang internet shop sa siyudad sa Cagayan de Oro.
Gibutyag sa RCB nga 50 porsinto sa internet shop nga ilang na-inspeksiyon nagpatuman na sa mga regulasiyon sama na lamang sa dili pagtugot sa mga menor de edad nga magdula, adunay blocking program alang sa porn sites o mga bastos nga mga sites, ug kinahanglan nga makita gikan sa gawas ang sulod sa internet shop diin wala usab kini mga saradong mga lawak.
Saysay ni Antonio Ramon Resma Jr., head sa team nga nagsusi niini, nga mas gipanghingusgan pa sa ilang buhatan ang maong balaod diin kaniadto mga anaa lamang sa 14 porsinto ug karon anaa sa 50 porsinto ang nagpatuman.
Gidugang pa nga halos katulo sa usa ka semana ang team sa RCB mopahigayon sa ilang information and education campaign.
Giingong ang mga piso net nga anaa sa suok-suok sila na mismo ang nagbutang og mga blocking program aron dili maabli sa mga kabataan ang mga porn sites.