DAVAO DEL SUR -- Gimando sa pamuno sa Davao del Sur Police Provincial Office (DSPPO) ang hugot nga seguridad sa tibuok probinsiya atol sa selebrasyon sa Eid'l Adha karong adlawa, Agosto 21.
Sumala ni Senior Superintendent Samuel Gadingan, police provincial director, nga gitahasan niini ang tanang hepe nga mohimo og patrolya ilabi na duol sa mga mosque aron bantayan ang seguridad sa mga kaigsuonang Muslim nga mohalad og mga pag-ampo.
Sanglit gideklara sa Malakanyang nga usa ka regular holiday karong adlawa, Agosto 21, tungod sa Eidul Adha ug Ninoy Aquino, mao nga way klase ug way trabaho ang mga publiko ug ubang pribadong opisina.
Gilauman sab ang pagdagsa sa ubang parokyano sa mga resorts mao nga angayang bantayan sa kapulisan ang palibot.
Ang Eid'l Adha mao ang tinuig nga selebrasyon sa mga Muslim aron hatagan og dakong respeto ang nakasulat sa Qur'an diin gihimo ni Ibrahim (Abraham) nga gi-sakripisyo niini ang iyang anak nga si Ismael tungod sa iyang pagpakita nga tinud-anay ang iyang pagsimba kang Allah. (Orlando B. Dinoy)