BANSALAN, Davao del Sur -- Nakahiagom og mga pangos ug bun-og sa lawas ang usa ka dalagang nars human natumba sa iyang gisakyang motor human gihimas sa lalaki nga nagsakay sab og motorsiklo.
Gisaysay ni Ana (bansagon gitago) nga samtang nagmaneho siya sa iyang motorsiklo pasado alas 7 sa gabii sa Agosto 19, nahitabo ang insidente.
Nakuratan ang biktima dihang paghidangat niya duol sa simbahan sa Iglesia Ni Cristo sa Barangay Poblacion Dos, kalit mitapad sa iyang motor ang usa ka lalaking nagtaptap ug gihikap dayon ang iyang paa padung sa pribadong parte niini.
Wa pa matagbaw, gipatiran pa sa wa mailhing suspek ang motor sa dalaga, hinungdan nalimbuwad kini hinungdan sa iyang pagkapangos.
Gihulagway sa biktima nga way plaka ang motor sa suspek ug kolor puti ang suga niini.
"Maayo na lang naay niagi nga motor unya nagpatabang ko niya og tindog," asoy niini.
Sa miaging bulan, laing dalaga sab sa Barangay Rizal sa samang dapit ang nabiktima sa manyak nga suspek.
Ang susamang insidente nahitabo sa Barangay Barayong, silingang lungsod sa Magsaysay, Davao del Sur.
Nabalaka na ang ubang babaye nga tig-motor kon di madakpan ang suspek kay basin sila ang sunod mabiktima niini. (Orlando B. Dinoy)