WAIVER sa usa ka tunghaang publiko dinhi sa dakbayan sa Davao gireklamo sa ginikanan.
Kini human masayri nga ang tunghaan nagpapirma og "waiver" sa ginikanan aron tugtan ang iyang anak nga mosalmot og aktibidad gawas sa eskuwelahan, pananglitan sa isports ug uban pang kompetisyon.
Matud pa sa ginikanan, way problema alang niya kon ang iyang anak mapilian kay dunay talento ug dad-on sa dapit aron nga irepresentar ang tulunghaan nga iyang gi-eskuwelahan.
Ang di niya masabtan, kon nganong papirmahon siya og "waiver" sa maestra aron ipamatuod nga way labot ang eskuwelahan kon dunay dautang mahitabo sa bata sa lugar nga iyang giadtoan.
Sa klarong pagkasulti, di manubag ang tulunghaan kon ugaling madisgrasya ang bata samtang nagtambong sa maong aktibidad.
Ang pangutana, kon di ang eskuwelahan, kinsa man diay ang angay nga manubag sa dangatan unya sa bata kon dunay dautang mahitabo?
Buot ba nga ipasabot sa nahisgutang eskuwelahan nga magpahayahay na lang unya sila ug ginikanan ang magbaguod kon dunay mahitabo sa bata? Apan kon molampos ang bata sa kompetisyon ikalipay ug garbo sa tunghaan?
Kon ingon niini ang baruganan sa eskuwelahan, mas maayo nga di na lang magpadala og representante nga bata nga mosalmot sa bisan unsang aktibidad nga sa gawas himuon.
Angay kining susihon sa kadagkoan sa Department of Education Region 11 kon ingon ba niini ang patakaran nga ilang gipasunod ngadto sa mga tulunghaan sa dakbayan.