"Nikalap ang hunghungihong nga nigrabe ang sakit sa presidente busa gusto na siyang pulihan."
MALIPAYONG paghandom sa anibersaryo sa pagkamatay ni kanhi Senador Ninoy Aquino ug pagsaulog sa importanteng pangilin sa atong mga kaigsuonang Muslim.
Nagpungasi ang komentaryo sa pamahayag ni Presidente Rody Duterte nga moluwat sa katungdanan.
Nahitabo kini niadtong niaging semana didto sa Malacanang Palace atubangan sa mga nag-unang negusyante sa nasud.
Iyang gisaysay na usab ang iyang mga programa batok druga, kriminalidad ug kurapsiyon sa Pilipinas.
Iyang gibalik ang taktika sa iyang administrasyon kabahin sa isyu sa West Philippine Sea ug sa Tsina. Gilakbitan sab niya pagsaway ang simbahang Romano Katoliko nga iya nang gibiyaan tungod sa daghang daw'ng iskandalo.
Didto sab sa atubangan sa mga kadagkoan sa negusyo, iyang gipirmahan ang orden sa pagpalagpot sa serbisyo sa duha ka heneral sa Armed Forces of the Philippines nga nahilambigit kuno sa kurapsiyon sa V. Luna Medical Center nga ospital para sa mga sundalong Pinoy.
Gisugo pa niya ang iyang military aide nga sultihan ang mga heneral nga magdungan silang duha sa impiyerno.
Apan ang nakapakurat sa nitambong ug sa minilyon nga nitan-aw sa TV mao ang iyang pamahayag nga dili niya kaya ang problema sa nasud ug gusto na niyang ipasa ang responsibilidad ngadto sa mosunod kaniya.
Sa pagkatinuod, dili bag-o kanato ang mga bahad ni PRody nga mo-resign sa puwesto kung gikinahanglan.
Apan medyo seryuso ang bag-o niyang pamahayag tungod kay makita nato sa iyang dagway ang kalapoy sa lawas ug lagom sa iyang nawong nga susama sa tawo nga masakiton.
Kamo kunoy sobra 70 anyos nga gipapas-an og pito ka sako nga bugas kung lalim ba? Ingon pa ni Teban nga "kabaw ka man, kapuyon ka usab."
Gani atong makita ang PRody nga walay kadasig sa iyang ikatulo nga State of the Nation Address.
Bisan sa iyang pakigpulong sa mga barangay officials dinhi sa Davao atol sa mass oath-taking sa gitukod nga Hugpong ng Pagbabago (HNP) party ni Mayor Inday Sara sa Lanang ning siyudad, daw lahi nga PRody ang naa sa intablado.
Nikalap ang hunghungihong nga nigrabe ang sakit sa presidente busa gusto na siyang pulihan.
Kung siya ang pabut-on, mas gusto niya nga modumala ang usa ka "military junta" sama sa nahitabo sa Thailand o di ba kaha sila si Senador Chiz Escudero o kanhi Senador Bongbong Marcos.
Tingali nakita ni PRody nga sila lang ang may "K" nga mopadayon sa iyang mga "iron-hand policy' ug programa de guerra nga di kaya ni Vice President Leni Robredo.
Timailhan ba kaha kini nga mobalik na ang mga Marcos sa Malacanang?