MALAMPUSON ang MLC Warriors sa ilang pagdepensa sa titulo sa 33rd Kadayawan Davao City Duckpin Bowlers Assn. (Daciba) Bowling Tournament niadtong Dominggo, Agosto 19, didto sa Dover Lanes.
Luyo nga dunay twice-to-beat advantage ang MLC, napildi nila ang MJC sa iskor, 542-539, aron mohari sa kompetisyon.
Una niini sa step-up-the ladder, gitagak sa no. 4 MJC ang no. 3 Sarabia sa iskor, 522-505, dayon gisunod nila og biktima ang no. 2 MAF sa iskor, 542-501, apan napakyas sila pag-abot sa MLC aron mabutang sa ikaduhang puwesto.
Samtang ikatulo ang MAF Tractor ug ikaupat ang tim Sarabia.
Sa indibiduwal sa Masters mens division, ang mikampeyon mao si Nonoy Calida nga gisundan nila Lito de Guzman, Jaime Bardon ug Noel Detuya alang sa tulo ka sunod nga puwesto sa maong han-ay.
Samtang sa babaye, gikoronahan si Bing Ramos Pogoy human iyang gipalukapa si Baby Guerra ug ikatulo si Engr. Allen Tibus dayon naa sa uwahi si Roxanne Mercado.
Ang mga midaug nakadawat og premyong kuwarta ug tropeyo gikan sa lokal panggobyerno sa Davao pinaagi sa Sports Development Division Office. (Marizz P. Perez)