KAY natayming sa Kadayawan sa Syudad sa Davao, si Mayor Sara Duterte nga lig-ong haligi sa Hugpong Ng Pagbabago (HNP) di madayon sa Sugbo ugma alang sa iyang expected speaking engagement sa League of Mayors of the Philippines (LMP) Visayas Cluster ugma sa Radisson Hotel.
Apan, nagpaabot ang mga organizer sa maong conference nga moabot si Presidente Rodrigo R. Duterte ugma. Gani, atong nasayran nga nag-coordination meeting na sila sa Presidential Management Staff (PMS) ug Presidential Security Group (PSG).
Kompirmado na sab ang pag-abot ni Gobernador Imee Marcos, nga lig-ong kaalyado sa Hugpong Ng Pagbabago didto sa Solid North.
Tayming ang maong kalihokan sa LMP kay mohatag kinig atensyon sa kahimtang sa politika sa Sugbo.
Sa pagkakaron, di pa gyud klaro ang battle lines sa lain-laing grupo sa lalawigan ug sa Syudad sa Sugbo. Pananglitan, bisan pa og pareho silang nitapon sa PDP-Laban, ang liderato sa Partido wala man makatanos sa panagbangi nilang Kong. Gwen Garcia ug Mayor Aljun Diamante sa Tuburan.
Si Gwen ang lider ug kandidato alang sa pagkagobernador sa One Cebu. Nagpaluyo siya sa init nga kaatbang ni Diamante diha sa Tuburan nga si Daphne Lagon. Sa atong miaging lindog, atong giklaro nga padayon kining usa ka lig-on nga political contender dinhi sa Sugbo.
Si Aljun, sa iyang bahin, maoy nagpaluyo sa Cebu Movement for Federalism (Cemfed) nga nakakuha sa suporta sa mayorya sa mga mayor sa lalawigan sa Sugbo.
Nibuhi kinig pulong dihang nitapon kini sa PDP-Laban sa miaging tuig nga padayon siyang mosuporta kang Gob. Junjun Davide. Kontrobersyal kini alang sa administrasyon kay gawas nga nagpadayon nga Liberal Party kini si Davide, anak pa gyud siya ni kanhi Chief Justice Hilario “Jun” Davide, ang usa sa dakong haligi sa oposisyon batok sa pag-usab sa Batakang Balaod.
Dayon, karong bag-o, nianunsyo kini nga moatbang kang PJ Garcia alang sa pagka kongresista sa Tersero Distrito.
Hinuon, naay mga alternatibong lider ang kampo ni Diamante sama ni Secretary Addy Sitoy nga lig-ong tigduso sa pederalismo. Gani, siya man ang nag-una nga gitahasan sa pagmasahe sa Kongreso ug Senado aron molusot kining giingong kausaban nga gisaad ni Presidente Duterte.
Timan-an nato nga ang chairman sa Cemfed mao man si Mayor Sitoy-Cho sa Cordova, ang anak ni Secretary Sitoy.
Laing lig-ong haligi sa Cemfed mao ang mga Gullas. Gawas nga sakop sa Alayon ang kampo ni Mayor Edigul sa Unang Distrito sa lalawigan, sakop sab kini sila sa Nacionalista Party (NP).
Ang NP bag-o lang nakig-kowalisyon sa Hugpong ng Pagbabago (HNP) ni Mayor Sara Duterte.
@anol_cebu sa Twitter