BABAG. Di moundang ang oposisyon sa konseho sa dakbayan sa Sugbo hangtud nga di mapadayon ang P18 bilyunes nga “Kawit Project” nga joint venture sa dakbayan ug sa Universal Hotels and Resorts Inc. (UHRI), nga gipanag-iya sa pamilyang Gokongwei tungod kay, matud pa sa oposisyon alkanse ang dakbayan sa maong kasabutan.
Ang nakaapan kay ang kaso nga gipasaka sa oposisyon batok ni Mayor Tomas Osmeña nga mapugngan ang kontrata sa joint venture sa UHRI naglakip usab sa pagpadeklarar sa duha ka Resolution No. 14-0183-2018 nga nagtugot kang Mayor Tomas sa pagpirma sa joint venture ug Resolution No. 14-0184-2018 sa paggamit sa yuta sa Binaliw alang sa landfill project.
Alang sa oposisyon sa konseho sa dakbayan kining duha ka resolution irregular ug illegal tungod kay, matod pa, gipasar ni sa mayoriya sa konseho nga nahuman na ang sesyon.
Apan kon ang mayoriya ang pasultion wa pa mahuman ang sesyon sa dihang nanggawas ang oposisyon tungod kay duna pay mga butang nga ilang tukion.
Ang dakbayan sa Sugbo karon wa nay landfill. Si Bise Mayor Edgar Labella ug pipila ka konsehal sa oposisyon dili supak sa landfill project. Apan alang kanila dili mao pamaagi sa mayoriya sa konseho sa pagpasar sa Resolution No. 14-0184-2018 nga nagtugot sa land use sa Binaliw alang sa landfill project nga iya sa usa ka pribado nga companiya.
Tungod kay dungan man nga gipasar ang duha ka resolution, nga matud pa sa oposisyon irregular ug illegal, mao nga malakip sa ilang kaso nga gipasaka batok ni Mayor Tomas ang pagpaanular sa resolution nga nagtugot sa landfill project. Tungod niini nga sitwasyon morag matinuod ang gipamung ni Mayor Tomas nga “political suicide” ang gibuhat sa oposisyon.
Si Bise Mayor Labella, sa among kadiyot nga paghinabi atol sa adlaw ni Bobby Nalzaro sa miaging duha ka Sabado didto sa beach resort ni Dr. Jay Ruiz, uyon sa landfill project apan ang iyang mga kauban sa oposisyon wa hatagi og dako nga bili sa pakinahanglan sa landfill sa dakbayan kay ila man giapil og babag sa “Kawit Project.”
Hinuon, kon dili makakuha og temporary restraining order (TRO) sa korte ang oposisyon ug dili madeklarar nga nulo ang duha ka resolution mopadayon ang “Kawit Project” ug ang landfill project.
Ang akong tinubdan miingon nga dunay mihangyo sa usa sa mga oposisyon nga di na lang unta ilakip sa kaso ang landfill project apan, matod pa, wa mohatag og commitment ang gihangyo.