HUMAN gipagawas sa Makati Regional Trial Court (RTC) ang warrant of arrest batok sa Sugboanong negosyanteng Peter Lim, hangtod karon wala pa matultuli ang nahimutangan sa magpapatigayon hinungdan nga wala pa kini ma-aresto. Ania pa kaha dinhi sa Sugbo o sa nasud si Ginoong Lim o nakagawas na kini sa nasud?
Mipagawas na usab og hold departure order ang korte batok ni Lim.
Apan unsa-on pagpugong kaniya nga makagawas kon atoa na siya sa gawas sa dihang iyang nasimhutan nang daan nga mogawas na ang warrant of arrest batok kaniya? Adunay insaktong koneksiyon si Lim sa mga ahensiya sa kagamhanan.
Gani, una naman nga nakagawas sa nasud ang iyang igsoon nga si Wellington Lim. Wala hinuon kini hold departure order.
Kini human banhigi ang iyang sakyanan. Maayo na lang gani kay bulletproof hinungdan nga wala siya maunsa. Gi-aksiyonan usab og sunog ang ilang Infinity bar ug gilabay og bomba ang ilang display area sa mga heavy equipment sa Mandaue City. Matod pa, bag-o na ang management sa Infinity bar karon. Ila na kaha kining nabaligya o lain lang ang nagdumala niini kay manglayas na sila?
Ang pagpasaka og kaso batok ni Peter Lim gumikan sa matod pa kalambigitan niini sa negosyo sa illegal nga drugas. Kini human siya hinganli ni self-confessed druglord Kerwin Espinosa. Dugay na kining mitumaw ang pangalan ni Lim apan wala mapamatud-i.
Lahi kining pagpasaka og kaso gikan sa Department of Justice ngadto sa korte ug lahi usab ang paghusay sa merito sa kaso. Wala makuha-i og drugas si Lim gikan mismo sa iyang posisyon kay kining mga druglord dili man mohupot og drugas. Ang pagka-konbikto unya ni Lim mag-agad og magdepende sa testimonya ni Kerwin ug ubang mga ebedensiya. Daghan bitaw nga naaktuhan gyud nga nakuhaan og ebidensiya apan absuwelto man. Unya pun-an pa sa depekto sa atong hustisya nga puwedeng mabayaran. Makonbikto kaha si Lim?
(bobbygnalzaro@gmail.com)