PADAYON nga gihasol og kontrobersiya kining pamunoan ni Toledo City Mayor Sonny Osmena tungod niining mga sunodsunod nga reklamo nga gipasaka ngadto sa hingtungdang ahensiya batok kaniya.
Niadtong Septiyembre 14, 2017, ang mayor gisuspenso sa Ombudsman og usa ka tuig tungod sa giingong pag-abuso niini sa iyang gahum human wa niya hatagi og bahin ang Barangay Daanglungsod sa real property tax sa dakbayan.
Pero wa pa gani mahuman pagserbisyo sa iyang pagkasuspenso, ang mayor nakabalik na sa puwesto niadtong Mayo ning tuiga, kini human gibali sa CA ang desisyon sa Ombudsman.
Pero miinsister ang sa Department of Interior and Local Government (DILG), nga pabilin gihapong suspendido si Osmena tungod kay aduna pa diay motion ang Ombudsman nga wa pa maresolbar sa CA. Padayag sa DILG nga kinahanglan tiwason niini ang upat ka nahibiling buwan sa iyang pagkasuspenso, butang nga hugot gisupak sa mayor.
Dinhi mitumaw ang kalibog karon sa mga lumolupyo sa Toledo kon kinsa man ang ilang tuohan. Ang DILG nga inubanan sa Ombudsman o ang Court of Appeals? Hayan kombatihan pa kini og hataas nga mga adlaw sa matag kampo.
Krusyal alang ni Osmena kining maong desisyon tungod kay nagkaduol na usab ang eleksiyon.
Pero yuna ra. Wa kahay laing reklamo nga atubangon na usab si Osmena?
Unsa ka tinuod nga dunay negusyante ang naglaraw karon sa pagdangop sa buhatan sa Ombudsman kay nagdumili ang mayor sa pag-renew sa iyang business permit bisan pa man og kompleto na kini sa papeles ug rekisitos sa rason nga ang opisina ra sa mayor ang nahibawo.
Basin og maghatag kini og dugang labad sa iyang ulo. Kini maoy atong paabuton. Grave abuse of power gihapon ang posibling ipasaka.