NALANTAWAN nga magbaha og superstars ang 2019 free agency sa National Basketball Association (NBA) apan gilauman nga ang usa sa labing giatangan nga si Golden State Warriors shooting guard Klay Thompson wala’y poruhan nga makuha sa laing team.
Giklaro sa four-time All-Star nga wala siya’y plano nga mobalhin og team ug sama sa iyang kaubang All-Star nga si Stephen Curry, tinguha niyang moretiro nga usa ka Warrior.
Gipasabot ni Thompson nga maayo ang ilang relasyon sa Warriors ug wala siya’y nakitang rason nga mobiya siya sa kasamtangang back-to-back champions.
Ang 28 anyos nga magduduwa puwedeng makadawat og $121 million sa masunod nga lima ka mga tuig kon mouyon kini sa upat ka mga tuig nga contract extension.
Wala pa man tuod klaro ang kabahin sa kontrata apan gipadayag nang daan ni Thompson nga dili masulod sa iyang hunahuna ang pagduwa sa laing team. ESL