BATA pa lang si Allen Escuadro sa Barangay Talamban, dakbayan sa Sugbo, mahiligon na siya og mga bisekleta.

Ang pag-assemble og bisekleta maoy iyang gikahiligan samtang siya nagdako.

Sa pakighinabi sa Superbalita Cebu, ang 57 anyos nagkanayon nga may mga higala siya niadto nga mopa-assemble niya og bike.

Nakasalmot na sab siya og nagkadaiyang mga bike racing competition niadtong batan-on pa siya.

Si Escuadro nailhan sa iyang lahi nga mga disenyo sa iyang gi-assemble nga mga bisekleta.

Matod niya nga ang una niyang na-assemble iyang gisunod sa bisikleta niadtong 1800s nga gitawag og penny-farthing o high wheeler.

Adunay mga walo ka hinimo na nga mga bike si Escuadro. Sagad sa iyang ginama nga mga bisikleta makapalingi gyud nimo tungod sa kalahi sa disensyo.

Aduna siyay hinimo nga biseklita nga dunay upat ka ligid, bike nga mahimong higdaan ug uban pa.

Recycled

Gitataw ni Escuadro nga iyang mga ginamit nga mga materyales sa paggama og bisekleta mga scrap o mga recycled nga mga parts sa bike gikan sa iyag mga higala ug paryente.

“Ang mga pisa used na, tinangtang sa akong mga amigo ug ig-agaw niya ang mga body nga gipanghimo nako kay mga scrap. Scrap tanan, ginamit na ang uban,” ni Escuadro.

Matod niya nga mga P1,000 lang ang iyang magasto sa pag-assemble sa iyang mga bisikleta.

Tungod kay iya kining sakyan usahay bisan paingon sa trabaho, daghan ang magpanglingi ug mopahulagway sa iyang bike.

Apan sigun niya nga ang iyang gidesenyong mga bike di baligya.

“For collection lang ang bike, daghan bitaw mangutana kung pila baligya o pahimo niya mobalibad lang ko kay di man sad ko kalugar gud kay sige kog trabaho,” ni Escuadro.

Ang lahi niyang mga disenyo sa bisikleta nakadaug sa sab sa local nga kompetisyon sa Earth Hour.

Lain niyang bisikleta ang nakadaug na sab sa Halloween Ride sa Mandaue niadto.

Gani, iyang mga nadisenyo nabutang na sa mga exhibit sa duha ka mga dagkong mall sa Sugbo.

“Malingaw ra man sad ko kay daghan kaayo ang ma-amaze nga mga tawo. Makapawa sa imong kakapoy og sikad,” sumala niya.

Si Escuadro nagkanayon nga dugay mahuman ang paghimo sa usa ka bike tungod kay iya ra man kini himuon kon way trabaho.

Usa ka mekaniko sa National Power Corporation (Napocor) si Escuadro ug sigun niya, ang iyang mga disenyo gikan lang sa iyang hunahuna o makit-ang hulgway.

Ang walo ka hinimo niyang bike lakip na sa iyang koleksyon sa mga vintage bike nga iyang gihipos sa iyang balay.

“Nindot kaayo paminawon nga daghang ma-amaze sa imong bike sa imong paghimo labi na kung magbike ko nga daghan manglingi og magpicture,” padayag niya. JPP