KASAMTANGANG nagserbisyo og tulo ka buwan nga suspensiyon si kanhi Talisay City mayor ug karon Konsehal Socrates Fernandez.
Kini human giimplementar sa Department of Interior and Local Government (DILG) Cebu Province ang desisyon sa Ombudsman, diin nakit-an si Fernandez nga sad-an sa kasong simple neglect of duty, dihang siya pa ang mayor sa Talisay niadtong 2013.
Ang kaso resulta sa giingong pakigkunsabo ni Fernandez sa iyang anak nga si Joavan aron makaeskapo kini gikan sa pagkabilanggo sa detention center sa Talisay City Police Station.
Nakaeskapo si Joavan niadtong Mayo 8, 2013, atol usab sa pagduaw sa iyang asawa ug upat ka mga anak sa police station.
Ang nagbantay nga pulis nihatag og higayon kang Joavan nga makagawas sa selda aron makahangop sa iyang pamilya.
Samtang gihimo kini, nanawag ang kanhi mayor sa cellphone sa asawa ni Joavan ug miingon nga gustong makig-estorya sa police on duty nga si PO2 Leandro Azarcon.
Samtang nag-estorya ang pulis ug ang mayor, diri na nakahigayon og dagan si Joavan ug nilahos pagsakay sa sakyanan iya usa ka Mitsubishi Adventure.
Ang sakyanan dunay plate number nga SJT 488 ug giisyu kini sa buhatan sa mayor.
Sa iyang counter-affidavit, gisalikway hinuon ni Fernandez ang kalambigitan sa pagsibat sa iyang anak.
Matod niya nga igo lang gi-park ang sakyanan kauban sa uban pang mga sakyanan nga iya sa kagamhanan sa siyudad.
Gihimug-atan hinuon sa Ombudsman nga nakahimo gihapon ang mayor ug pagpasagad sa iyang trabaho sanglit wa niini gisrguro nga di magamit o mahilabtan sa di awtorisadong mga tawo ang mga sakyanan sa dakbayan.
Si DILG Cebu Provincial Director Jerome Gonzales niimplementar sa tulo ka buwan nga suspensiyon nga way sweldo batok ni Fernandez niadtong Hulyo 31. AZLG