BUOT sa Department of Interior and Local Government (DILG) nga mapadayon ang pagserbisyo ni Toledo City Mayor John Henry Osmeña sa nahibiling upat ka buwan sa iyang usa ka tuig nga suspensiyon.
Abogado sa mayor nipasidaan sa DILG nga maghinay-hinay niini sanglit usa kini nga judicial issue, diin ang Court of Appeals na maoy nidesisyon nga ipadaplin ang suspension order.
Tuyo nga nibisita sa buhatan sa DILG-Cebu Province ang abogado ni Osmeña nga si Inocencio de la Cerna human usab siya nakadawat ug suwat gikan sa DILG Central Office.
Unod sa maong suwat ang baruganan sa ahensiya nga ipadayon ang suspensiyon, nga maoy silot sa mayor sa kasong grave abuse of authority.
Nidesisyon ang Office of the Ombudsman niadtong Enero 2017 pagsuspenso kang Osmeña human giingong gipugngan niini ang paghatag sa real property tax share sa Barangay Daanglungsod niadtog 2014 ug 2015.
Apan ang Court of Appeals nibali sa desisyon sa Ombudsman tungod sa doctrine of condonation busa nakalingkod nag balik si Osmeña niadtong Mayo karong tuiga, bisan ug duna pay nahibiling upat ka buwan sa iyang penalty suspension.
Sa suwat sa DILG, gitumbok niini nga wa gimando sa CA ang immediate execution sa ilang desisyon ug duna say motion of reconsideration (MR) nga giduso ang Ombudsman subay sa desisyon busa angayang di pa makabalik ang mayor sa pwesto.
Alang ni de la Cerna, bisan ug di pinal ang desisyon sa CA apan executory kini busa magpabilin si Osmeña sa katungdanan.
Matod niya nga angayang paabuton na lang sa Ombudsman ug DILG ang desisyon sa MR og kon di matagbaw niini, mosaka sa Korte Suprema.
Ang abogado sa mayor wa pa makadawat sa MR nga giingong giduso sa Ombudsman subay sa pagbali sa CA sa desisyon niini sa kaso ni Osmeña.
Sa laing bahin, ang DILG Cebu Province, pinaagi sa director niini nga si Jerome Gonzales niklaro nga wa pa siya makadawat og pormal nga kamanduan gikan sa ilang uluhang buhatan alang sa subling pag-implementar sa suspensiyon sa mayor sa Toledo City.
Dihang nibalik paglingkod si Osmeña pagka-mayor niadtong Mayo, gipahibalo niya niini ang konseho sa ilang siyudad ug gani ang acting mayor nga si Bise Mayor Antonio Yapha, ni-acknowledge man niini ug nibalik sa iyang naandan nga posisyon. AZLG