NAUSAB ang mga schedule sa kalihukan sa kagamhanan sa dakbayan sa Mandaue nunot sa gikatakdang pagbisita ni Presidente Rodrigo Duterte sa dakbayan atol mismo sa kasaulogan sa Charter Day ning tuiga.
Imbes nga groundbreaking sa P1 bilyones nga government center ang mahitabo karong Agosto 30 luyo sa City Cultural and Sports Complex, groundbreaking ceremony na sa low rise housing project didto sa Brgy. Looc ang ipahigayon.
Ang groundbreaking sa proyekto nga gipundohan sa National Housing Authority (NHA) maoy gikatakdang tambungan ni Duterte mga alas 4 sa hapon, pahibawo ni Konsehal Carmelino Del Mar sa dihang nahinabi sa Superbalita Cebu.
Dugang niya nga possibleng mokuyog sa presidente ang anak niini nga si Davao City Mayor Sarah Duterte, Ilocos Norte Governor Imee Marcos, Sec. Harry Roque, SAP Bong Go, JV Ejercito ug Sonny Angara.
Ang mga personalidad nga kuyog sa presidente gikatahong adunay kalihukan sa partidong Hugpong Pagbabago nianang pagkabuntag.
Human sa groundbreaking, adunay taho nga nadawat kining mantalaan nga mohatag og pakigpulong si Duterte ngadto sa mga kawani sa city hall sa sports complex.
Apan di pa kini kumpirmado sa kagamhanan sa dakbayan tungod kay wa pa may kompirmasyon gikan sa Presidential Management Staff.
“Nausab ang schedule tungod kay gibase man gud nato sa schedule sa pagbisita ni President,” matod ni del Mar kinsa maoy executive chairman sa charter day ning tuiga.
Wa pa usay petsa kon kanus-a ipahigayon sa Mandaue ang groundbreaking sa government center niini.
Ang Taxpayers Awards Night nga ipahigayon unta sa gabii sa Agosto 30 gibalhin na sa Agosto 29.
Ang mga kausaban sa Charter Day gihisgutan ni Quisumbing uban sa mga department head sa dihang nagpatawag kini og meeting kagahapon sa udto nga nahuman pagkahapon.
Kon madayon ang presidente, kini na ang ikaduhang higayon nga kini mibisita sa Sugbo ning buwana human sa pagtambong niini sa kalihukan sa League of Municipalities of the Philippines (LMP) karong adlawa sa Radisson Blu hotel. JPP