DUHA ka mga balay sa Sugboanong negosyante nga si Peter Lim gibisita sa mga sakop sa Mabolo police station kagahapon sa hapon inabagan sa Criminal Investigation and Detection Group 7 ug Special Weapons and Tactics aron i-serve ang warrant of arrest nga giluwatan sa korte sa Makati City.
Bisan sa anino ni Lim, way nakit-an ang kapulisan sa balay niini sa 12 Tres Borces Extension, Barangay Kasambagan, dakbayan sa Sugbo ug katabang lang ang nipatim-aw.
Ang warrant of arrest giluwatan ni acting presiding Judge Ginami Palamos sa National Capital Judicial Region Branch 65 sa dakbayan sa Makati sa kasong illegal drugs.
Katabang lang ang miatubang kang Chief Inspector Dindo Alaras nga giila nga si Rosalie Bacalla, kinsa nagsilbi sa pamilyang Lim sud na sa napulo ka tuig.
“Dugay nako diri, Sir, wala man ko kabantay nga nianhi na siya diri, iya rang mama naa diri,” matod ni Bacalla.
Wa na pasudla ni Bacalla ang mga pulis sa balay ni Lim.
Samtang ang laing team nga miadto sa balay ni Lim sa Sto. Niño Village, Barangay Banilad, syudad sa Sugbo, igo lang gidawat sa gwardya ang kopya sa warrant of arrest ug mipahibawo nga wa usab si Lim sa maong balay.
Gitugotan sa gwardya nga makasulod ang mga pulis apan wala gihapon ang maong Sugboanong magpapatigayon.
Matod ni Alaras nga magpaabot pa silag napulo ka adlaw aron ibalik sa korte ang maong arrest warrant.
“Magsige pa tag monitor kon asa ang whereabout karon ni Peter Lim. Apil sa atong i-monitor ang iyang mga properties or establishment niya. Anyway kon molapas na sa 10 days nya dili pa gihapon ma-locate, atong ibalik ang warrant sa court. Ang court na ang bahala, moisyu silag alias warrant,” matod ni Alaras.