MAKIGPULONG si Presidente Rodrigo Duterte atubangan sa 369 ka mga mayor sa Kabisay-an sa tinuig nga cluster conference sa League of Municipalities of the Philippines (LMP) karong hapon sa Radisson Blu hotel sa siyudad sa Sugbo.
Gibutyag ni Tuburan Mayor Democrito “Aljun” Diamante, presidente sa LMP Cebu Chapter ug bise presidente sa Visayas Cluster, nga ang hisgutanan sa pederalismo ang usa sa mga tukion sa presidente sa iyang pakigpulong atubangan sa mga mayor nga gikan sa 16 ka mga lalawigan sa Central, Eastern ug Western Visayas.
Alas 5:30 sa hapon gipaabot mamulong si Duterte.
Matod niya, kini ang tinuig nila nga kalihokan sa mga miyembro sa LMP diin ang mga mayor sa Mindanao nipahigayon sa siyudad sa Davao niadtong Hulyo 12 ug 13, samtang karong Septiyembre 17 ug 18 alang sa mga mayor sa Luzon nga adto usab ipahigayon sa Davao.
“Ni-commit si President nga every conference mo-attend siya,” sigon ni Diamante sa pakighinabi sa Superbalita Cebu kagahapon.
Matod ni Chief Superindent Debold Sinas, direktor sa PRO 7, nga sama sa naandan hugot nga siguridad ang ilang ipatuman inabagan sa mga sakop sa Presidential Security Group nga una nang naabot sa Sugbo usa ka adlaw sa wa pa naabot ang pangulo. SCG, AYB